Gjana: Do kompensohen fermerët

 

“ Kompanitë private që kanë furnizuar me këtë farë misri, do të dëmshpërblejnë të gjithë fermerët që janë dëmtuar nga përdorimi i saj. Deklarata nga kompanitë është bërë publike më datën 4 shtator 2008. Dëmshpërblimi do të llogaritet bazuar në sipërfaqet e verifikuara për çdo fermer dhe rendimentin për hektar sipas zonave”, këtë deklaratë bëri dje ministri i Bujqësisë, Jemin Gjana. Sipas tij, MBUMK e ka monitoruar dhe po e monitoron hap pas hapi këtë proces, por pavarësisht deklaratave politike të opozitës, asnjë lek nga buxheti i shtetit, asnjë lek nga fondet e taksapaguesve shqiptarë, nuk do të përdoret për këtë dëmshpërblim. I menjëhershëm ka qenë reagimi Partisë Socialiste pas deklaratës së ministrit të Bujqësisë dhe Ushqimit. Zëdhënësja e kryesisë së Partisë Socialiste, Mimi Kodheli, e cilësoi aspak  dinjitoze për një qeveri që t’u kthejë kurrizin qytetarëve të dëmtuar. “Ministri i qeverisë “Berisha” tregoi sot se për këtë Kryeministër e për këtë qeveri në fshat s’ka njerëz, por qenie të gjalla që duhet ta gjejnë vetë rrugën e mbijetesës edhe kur për faj të shtetit mashtrohen nga privati, që u shet farë misri false. Këtyre qeveritarëve të paaftë e të pandjeshëm ndaj hallit të madh të mijëra familjeve po u lexoj nenin 44 të Kushtetutës së Republikës së Shqipërisë: “Kushdo ka të drejtë të zhdëmtohet në përputhje me ligjin, në rast se është dëmtuar për shkak të një akti, veprimi ose mosveprimi të paligjshëm të organeve shtetërore”, tha Kodheli.