Gjinushi ashpërson gjuhën me Ramën

Kryesocialdemokrati ashpërson gjuhën me Partinë Socialiste. Skënder Gjinushi nuk ia fal dot aleatit të tij më të ngushtë, Edi Rama, që nuk bojkotoi seancën e dy ditëve më parë pas incidentit midis Kryeministrit dhe deputetit socialist, Taulant Balla. “Të shkosh në atë sallë Kuvendi, në ato kushte, me atë drejtuese është si të frekuentosh motelet e dyshimta, pastaj të ankohesh për përdhunim. Bojkoti ynë dje ishte për të shprehur mospajtimin tonë për degradimin e Kuvendit dhe të demokracisë në nivelet e fjalorit të rrugëve dhe të moteleve më të përfolura”, - tha Gjinushi, i cili i kërkon Ramës që të bëjë opozitë dhe të mos qëndrojë i tërhequr. Sipas tij, për PSD-në roli i opozitës është të mbrojë institucionet; të mbrojë respektimin e ligjit dhe Kushtetutës në emër të qytetarit dhe jo të ulë kurrizin, as të shkelë mbi të drejtat e saj, e as të mbajë shënim shkeljet e turpet e radhës. “Të tolerosh këtë qeveri, të tolerosh këtë qeverisje, do të thotë të tolerosh krimin shtetëror të Gërdecit; do të thotë të tolerosh vjedhjet e korrupsionin masiv; do të thotë të tolerosh varfërimin e shqiptarëve; do të thotë të tolerosh arrogancën ndaj biznesit e shantazhin ndaj medias”, - tha ai. Edhe më parë Gjinushi e ka kritikuar Ramën, duke pranuar se zërat kundër në parti vijnë pikërisht se PS-ja po bën opozitë të dobët.