Gjoçaj, fshati i thellë me 40 banorë që nxori 4 kandidatë për deputetë
BURREL - Gjoçaj është një fshat malor në komunën e Derjanit. Deri në vitin 1990 kishte afro 100 shtëpi, ndërsa sot numëron rreth 40 banorë. Toka e pakët, mungesa e vendeve të punës, gjendja e rënduar e infrastrukturës kanë bërë që banorët e fshatit të largët të largohen njëri pas tjetrit në drejtim të Tiranës dhe Durrësit. Në këtë fushatë, vetëm nga ky fshat janë në garë 4 kandidatë për deputetë, në listën e Qarkut të Dibrës. Për PD-në konkurron Dhurata Çupi, specialiste në Ministrinë e Brendshme, e cila qëndron e 6-ta në listën shumemërore. Afro 30 vjet më parë është larguar nga fshati dhe banon në kryeqytet. Për PSV‘91 kandidon ish-deputeti i PSSH-së, Halil Lalaj. Bashkimi Liberal Demokrat ka vendosur në listën e kandidatëve në vendin e dytë arkitektin Bledar Pasha. Ndërsa për të gjelbërit, po në vendin e dytë është caktuar studenti Bledar Lala. Kandidatja e PD-së Çupi ka udhëtuar drejt vendlindjes me 30-40 banorë, së bashku me drejtues të PD-së së rrethit e kandidatë të tjerë. “Dialogu” ka qenë i veçantë. Eshtë folur për Rrugën e Kukësit, për NATO-n, për vizat, duke harruar se banorët e mbetur jetojnë mes varfërisë ekstreme. Biseda ka rrjedhur e qetë, por nuk kanë munguar edhe gafat elektorale të stafit të kandidates Çupi. Duke dashur të thotë se “ky fshat do të ketë rrugë” folësi ka ngatërruar zonën e Mirditës me atë të Matit, rreth në të cilin ndodhet fshati Gjoçaj. Vajza nga fshati malor është shprehur se e kishte “për nder e krenari” që ishte përfshirë në listën e Kryeministrit Berisha dhe shprehu siguri se do të fitonte maksimumin e votave. Ndërkohë kandidatët e tjerë, Halil Lalaj, Bledar Pasha e Bledar Lala kanë preferuar të mos organizojnë takime në fshatin e vendlindjes. Po ditën e takimit të Çupit me zgjedhësit e fshatit ka udhëtuar drejt Gjoçajve edhe kandidati socialist, Qemal Minxhozi, i cili ka shkuar në çdo shtëpi, duke dëgjuar shqetësimet dhe hallet e banorëve të mbetur. Në këtë fshat, ashtu si dhe në ata fqinjë me të, banorët janë larguar prej kohësh, por fakti që nuk janë çregjistruar ka ngatërruar dhe kandidatët. h.p