Gjykata e apelit rikthen në qeli Marjan Grykën, për veprën penale të “shpifjes ndaj policisë

Apeli rikthen në qeli Marjan Grykën. Ndalimi i tij u bë për veprën penale të “Shpifjes ndaj policisë. 37 vjeçari nga Shkodra Marjan Gryka është rindaluar sërishmi dje nga policia e Shkodrës duke u dërguar në dhomat e paraburgimit. Zëdhënësja e Drejtorisë së Policisë së Qarkut të Shkodrës tha se ekzekutimi i Urdhërit të Ndalimit të Prokurorisë së Rrethit Shkodër për shtetasin Marjan Gryka, lindur dhe banues në qytetin e Shkodrës është bërë në orët e mesditës së djeshme. Sipas këtyre burimeve, ndalimi i Grykës është bërë pasi, Gjykata e Apelit në Shkodër ka rrëzuar kërkesën e këtij shtetasi për zëvendësimin e masës së sigurisë nga “arrest në burg” në atë të “Garancisë pasurore”, duke vendosur si masë sigurimi “arrest me burg”. Sipas të njëjtit burim, nga ana e policisë u bë shpallja në kërkim dhe më pas ndalimi i shtetasit Marjan Gryka. Shtetasi Marjan Gryka ka qenë i ndaluar me datë 9 tetor të këtij viti në bazë të vendimit të Gjykatës së Shkallës së Parë të Shkodrës me caktimin e masës së sigurisë “arrest me burg”, vendim i cili u mor për çështjen penale të të datës 27 shtator të po këtij viti, ditë kur Gryka është plagosur me armë zjarri në aksin rrugor Shirokë-Zogaj të qytetit të Shkodrës. Gjithnjë nga të dhënat që ofron policia e Shkodrës, vendimi i gjykatës së Shkodrës është mbështetur në rezultatet e hetimeve të kryera, në katet e ekspertimit balistik, kimik e mjeko ligjor, si dhe në thëniet kontradiktore të shtetasit Marian Gryka, rreth ngjarjes së ndodhur atë natë. Ndërkohë, bazuar në hetimet dhe grumbullimi i provave, Drejtoria e Policisë ka ngritur padi ndaj këtij shtetasi për veprën penale të “Shpifjes ndaj Policisë”. Materialet në ngarkim të këtij shtetasi do t’i kalojnë Prokurorisë së Rrethit për veprime të mëtejshme.