Grabitet kambisti, dy të maskuar morën 41 mijë euro

 

SHKODER / RIDVAN DIBRA

Dy persona të "maskuar" me skafandra motori i grabisnin kambistit 41 mijë euro. Ngjarja ndodhi mbrëmjen e së dielës, në lagjen "Dergut" të Shkodrës. Viktimë e kësaj grabitjeje, e cila dyshohet të jetë mirorganizuar deri në detaje nga autorët, është 40-vjeçari Altin Heqimi. Kambisti është grabitur në momentin që do të hapte portën e madhe të oborrit të shtëpisë e tij. Sipas dëshmisë së dhënë në polici, 40-vjeçari kishte mbaruar punën rreth orës 20:00. Pasi mori me vete çantën me paratë, ai mbylli dyqanin e tij tek "Dollari", zonë ku ushtronte punën e përditshme si kambist. Kur i është afruar shtëpisë, Heqimi del nga makina për të hapur portën e oborrit, duke e lënë mjetin e ndezur, ashtu siç bënte zakonisht. Në këtë kohë, grabitësit vepruan. Kambisti dalloi dy persona në një motor me skafandra në kokë, të cilët u afruan nxitimthi, hapën bagazhin e makinës dhe u larguan me shpejtësi. Në përfundim të kësaj skene, kambisti u afrua me të shpejtë tek mjeti i tij. Por ai pa që në bagazhin e makinës nuk ndodhej çanta me paratë që ishin lekë shqiptare dhe valutë. Pas ngjarjes, 40-vjeçari bëri denoncim në Drejtorinë e policisë së Shkodrës. Ai deklaroi se dy grabitës të maskuar me skafandra i kishin marrë atij çantën, në të cilën ndodheshin rreth 41 mijë euro. Sipas policisë, në bazë të hetimeve që janë bazuar kryesisht edhe në deponimet e vetë të së dëmtuarit, grabitësit kanë qenë dy persona, që kanë lëvizur me një motor "skuter". Në bazë të deponimeve të tij, policia dyshon se grabitësit e kishin paramenduar me imtësi mënyrën e realizimit të kësaj grabitjeje. Ata mund të kenë studiuar më parë çdo lëvizje të kambistit, duke pasur edhe informata të sakta për orën kur dilte nga dyqani, deri te detajet e tjera të lënies ndezur të makinës në momentin kur hapte portën. Sipas policisë, dyshohet se grabitësit e kanë ndjekur më parë, derisa janë bindur për ritualin e veprimeve të 40-vjeçarit. Blutë e Shkodrës kanë shoqëruar disa persona, të cilët mund të jenë të implikuar apo kanë dijeni për këtë grabitje. Por deri tani, nuk ka ende të identifikuar si autorë të ngjarjes.