Greva, Xhaçka dhe Ligori dërgohen në spital

Pas ditës së 18-të, 60-të grevistë shtrohen në gjendje të rëndë në spital

TIRANË - Të dukej se do të ishte njeriu i fundit që do të braktiste çadrën, aty ku prej 18 ditësh qëndrojnë në grevë urie në pritje të një zgjidhjeje për transparencën e zgjedhjeve deputetë dhe simpatizantë të partisë Socialiste.

Por, në fakt, në orët e pasdites së djeshme, Shegushe Ligori është detyruar nga ekipi mjekësor që mbikëqyr situatën në çadrën përballë kryeministrisë të braktisë grevën e urisë.

Me dërgimin e deputetes Ligori në qendrën spitalore për një mjekim më të specializuar ka vajtur në 60-të numri i grevistëve që janë detyruar të braktisin çadrën, ndërkohë që ende nuk është arritur zgjidhja e ngërçit politik.

Po gjatë pasdites së djeshme janë dërguar për në spital dy grevistë të tjerë. Elez Braha, 43 vjeç, nga Kukësi dhe Fasli Rustemi, 44 vjeç, nga Kopliku, Malësia e Madhe. Ndërsa më herët, në mesditë, po nga ekipi mjekësor është detyruar të dërgohet në spital për shkak të problemeve me tensionin dhe stomakun edhe deputetja e PS-së, Olta Xhacka. Ajo është dërguar në spital në orën 14:00 të ditës së djeshme.

Në fakt që në orët e para të paradites së djeshme, për shkak të komplikacioneve që kanë të gjithë grevistët, shoqërimi për në spital i tyre është kthyer në ndërhyrjen më emergjente të mjekëve që kryejnë shërbim 24 orë në çadrën e instaluar prej 18 ditësh përballë kryeministrisë. Rreth orës 09:30 minuta të paradites së djeshme është dërguar në spitalin Infektiv të QSUT-së një tjetër grevist i Partisë Socialiste.

Grevisti ishte Preng Tuci, 56 vjeç, i cili ka lënë çadrat e grevës së urisë për tu dërguar me urgjencë në spital. Ndërsa pak më vonë ekipi mjekësorë ka "urdhëruar" që të shoqërohet në spital të riun nga Tirana, Oltian Ruçi.