Grupi hetimor, shqyrtim kartelës mjekësore për vdekjen e 17-vjeçares

TIRANË - Hetimet për zbardhjen e rrethanave dhe shkaqeve të vdekjes së pacientes 17-vjeçare nga Korça disa javë më parë në spitalin “Nënë Tereza” në Tiranë, janë përqendruar në shqyrtimin e kartelave mjekësore të saj. Burime nga Prokuroria e Tiranës bënë të ditur dje se grupi hetimor u ka vënë në dispozicion ekspertëve mjeko - ligjorë të gjithë praktikën mjekësore të ndjekur për këtë rast, si në klinikën e Pogradecit dhe të Korçës, ashtu edhe në Spitalin e Tiranës. Sipas këtyre burimeve, pas kësaj procedure hetuesit pritet të dalin në një konkluzion për pozicionin e mjekëve në këtë çështje. Matilda Petriti, 17 vjeçe, nga Korça, humbi jetën para disa javësh në spitalin “Nënë Tereza” si pasojë e një hemorragjie. Nga të dhënat hetimore rezulton se kjo shtetase i ishte nënshtruar më parë një vizite mjekësore në Spitalin e Korçës edhe një ndërhyrjeje kirurgjikale (në bajame) në një klinikë në Pogradec. Ndërkohë që çështja penale ka për objekt hetimi veprën penale te “mjekimit të pakujdesshëm”.

19 Qershor 2008