Hajrie Hasani, djali im është 15 vjeç, nuk ka celular

19/03/2005  Ndërsa Ardian Llapushi dhe kunati i tij, Elvis Perthi, u vunë në pranga në Tiranë, Mario Hasani i provoi ato në Lushnjë, pasi la orën e mësimit. Nëna e Marios, Hajrie Hasani, tha dje se tre civilë shkuan në shkollë dhe e nxorën djalin nga ora e mësimit. Civilët i kërkuan mësuesit se do të bënin një sqarim me Marion dhe më pas do ta kthenin përsëri. Fillimisht, Mario shoqërohet në komisariatin e Lushnjës dhe më pas dërgohet në Tiranë. Nëna e Marios, 15-vjeçarit, tha dje se djali i saj nuk ka patur fare celular, e jo më të ketë dijeni për personin e vrarë te "Don Bosko". Kundër veprimeve të policisë folën edhe motrat e të pandehurit Ardian Llapushi. Ato thanë dje se vëllai i tyre ka punuar në Greqi dhe tashmë jeton me prindërit dhe gruan, duke e përjashtuar nga çfarëdolloj ngjarjeje. Sipas motrave të Llapushit, policia nuk mund të fusë në burg persona të pafajshëm vetëm se kanë në celular një numër anonim.