Hapet tuneli,kalojnë qindra makina

KUKES - Hapja e galerisë veriore të tunelit të Kalimashit rikthen fluksin e udhëtarëve. Që prej ditës së djeshme, nga Morini në Tiranë e anasjellas do të shkurtohen 3 orë nga udhëtimi përgjatë rrugës së vjetër. Galeria e çelur dje zyrtarisht, sipas të dhënave të firmës "Bechtel Enka" ka përfunduar plotësisht, çka do të thotë se nuk pritet një mbyllje e saj, ashtu siç ndodhi me galerinë tjetër. Porta që tregonte nisjen e udhëtimit të parë në këtë galeri u hap në orën 09:30, duke shënuar deri në mbrëmje kalimin e qindra mjeteve. Brenda galerisë udhëtimi që zgjat vetëm 8 minuta bëhet njëkalimësh dhe vargu i mjeteve që hyjnë në tunel udhëhiqet nga një mjet zjarrfikës. Nuk do të ketë kufizime të kohës dhe tuneli do të jetë i hapur për udhëtarët 24 orë. Numri rekord i udhëtimeve pritet të jetë gjatë muajve të verës, për shkak të turistëve që vijnë nga Kosova dhe ata që nga portet dhe aeroporti udhëtojnë drejt veriut. j.h