Hotolisht, Basha: Nën etiketë të re, Rama po rikthen ministrat e diktaturës

Ministri i Punëve të Jashtme, Lulzim Basha, vijoi takimet me banorët e Hotolishtit dhe Polisit nga ku lëshoi akuza të ashpra ndaj kreut të PS-së, Edi Rama. Duke folur përpara banorëve të këtyre komunave, Basha tha se alternativa e vetme e Ramës është riciklimi i ministrave të diktaturës. Sipas tij, nën një etiketë të re, Rama po tenton të rikthejë ministrat që gjakosën studentët. “Alternativa e “politikës së re” të Edi Ramës, është riciklimi i ministrave të diktaturës komuniste. Nën etiketën politike e re, të rikthejë ministrat e diktaturës, ata që gjakosën studentet, ata që varfëruan shqiptarët dhe që kërkojnë të pasurohen përsëri si monopolistë në ortakëri me krimin dhe konfliktin e interesit”, - deklaroi Basha. Duke qëndruar tek mandati i dytë, Basha premtoi më shumë investime për këto zona. “Gjatë këtij mandati, 13 mijë familje përfituan 30 milion dollarë, deri në vitin 2010 do të kenë 22 milionë dollarë. Në 4 vitet e ardhshme do të katërfishohen, se për ne, integrimi evropian nuk ka kuptim pa fshatin evropian”, - premtoi Basha duke shtuar se në katër vitet e ardhshme, do të gjashtëfishohet granti për fermerët. Ministri i Jashtëm Basha bëri një bilanc të investimeve në këto komuna ku ka theksuar se në këtë mandat janë investuar 1.755 miliardë lekë të vjetra në infrastrukturë, shëndetësi, arsim etj.