I dënuari përjetë, ha brisqe në burg

 

FUSHE-KRUJE - I dënuari me burgim të përjetshëm gëlltit brisqe në qelinë e burgut. Burime zyrtare të burgut të Fushë-Krujës konfirmuan dje për “Panorama”, se i dënuari Valmir Hoxha, i njohur si “i forti i Shkodrës” kishte gëlltitur tehe brisqesh rroje. Ngjarja ka ndodhur mbrëmjen e së hënës, ndërsa shëndeti i të dënuarit është normal. Sipas burimeve, i dënuari Hoxha vetëm pak ditë më parë ishte vendosur në ambientet e burgut të Fushë-Krujës, pasi ishte transferuar nga burgu i Peqinit. “I dënuari ka probleme me përshtatjen”, thanë burimet. Për shkak të një përballjeje ai është transferuar të hënën nga qelia e tij në një qeli të veçuar, vend ku ka konsumuar edhe metalin e mprehtë. Po sipas burimeve, Hoxha nuk ka shfaqur probleme shëndetësore. Valmir Hoxha u arrestua në vitin 2003, pasi gjykata kishte dhënë për të një vendim me burgim të përjetshëm për veprat penale të vrasjes, plagosjes, grabitjes dhe përdhunimit.