I ngacmon gruan, godet me qytë muratorin 44-vjeçar

Plagosin me qytën e pistoletës një 44-vjeçar, prangosen dy vëllezër nga Roskoveci. Ngjarja ka ndodhur mbrëmjen e së mërkurës në një lokal në qendër të qytezës. Burime nga Policia e Fierit bëjnë të ditur se rreth orës 19.30 të së mërkurës janë ndaluar vëllezërit Fitim dhe Luan Azizi, përkatësisht 36 dhe 33 vjeç, pasi kanë plagosur 44-vjeçarin Vladimir Kola. Mësohet se 44- vjeçari, banues në Fier, me profesion murator, punonte në ndërtimin e vilave të dy vëllezërve Azizi. Gjatë punës së tij ai nuk kishte ngurruar që të ngacmonte një nga bashkëshortet e punëdhënësve të tij dhe pikërisht bashkëshorten e më të voglit, Luanit. Këto veprime, të cilat ishin parë prej 33-vjeçarit Luan Azizit, kishin nisur të krisnin lidhjen martesore. Duke mësuar se ky ka qenë një ngacmim i njëanshëm nga ana e 44-vjeçarit Kola, dy vëllezërit nisen në drejtim të tij të armatosur. E kanë gjetur pasditen e së mërkurës në një nga lokalet e qytezës dhe kanë nisur ta qëllojnë me grushte. Më pas, njëri prej tyre ka nxjerrë nga xhepi një pistoletë dhe me qytën e saj e ka qëlluar atë dy herë në kokë. Pasi e kanë lënë të shtrirë në lokal janë larguar për t‘u prangosur nga policia pak minuta më pas. Dy vëllezërit Azizi do të përgjigjen për plagosje dhe armëmbajtje pa leje.

Ma.Tr.