In Memoriam lirisë së Dergjinit
Ermir Dergjini u nda nga jeta në një moshë të parakohshme, në kulm të pjekurisë dhe formimit të tij krijues. Në fletët e “CV”-së së tij shkruhet: Lindur në Tiranë, më 19 janar 1955; kompozitor profesionist, pedagog në Akademinë e Arteve – Fakulteti i Muzikës, “Profesor i Asociuar”... Mjafton për të prezantuar qytetarin Ermir Dergjinin, burrin korrekt, babanë shembullor e të përkushtuar të dy vajzave dhe njeriun këmbëngulës e punëtor në realizimin e aspiratave krijuese. Motiv mjaft domethënës i karakterit në sfidën e gjatë ndaj sëmundjes disavjeçare. Duke filluar nga vitit 1976 e në vijim opusi i veprave të tij përmban 40 krijime. Në më të realizuarat ndihet dukshëm orientimi bashkëkohor, ambicia në përvetësimin e teknikave serialiste dodekafonike, ndihet liria e krijuesit që i shmanget konvecioneve të estetikës së kufizuar e dogmatike, në kërkim të hapësirave të reja shprehëse. Pas disa specializimeve në muzikë seriale me kompozitorin W. Ufschmid (Gjermani) 1993, Mikrosoft Word & Computer Music Mc Knight – USA – 1997, Muzikë elektroakustike në Marsejë – Francë – 1999, ai me guxim eksploron përherë e më tepër idetë novatore strategjitë e reja muzikore dhe pothuajse nuk mungon në çdo aktivitet artistik të muzikës së re, duke mos u tërhequr edhe në rastet e rrezikimit të mos suksesit.
Vepra e tij interpretuar nga solistë të njohur këngëtarë lirikë apo instrumentistë, si dhe nga orkestrat simfonike të RTSH apo trupa e Operës dhe Baletit Kombëtar njohu realizimin dhe suksesin në skenat prestigjioze të kryeqytetit.
Ajo jo rrallë u vlerësua me çmime nga juri profesioniste, në përbërjen e të cilave ka pasur edhe personalitete të huaj në fushën e muzikës.
Disa prej tyre janë: 1984 – Çmimi i tretë parë “Koncertiton” për violinë dhe piano
1991 - Çmimi i dytë për “Koncertin” për orkestër simfonike; 1995 – Çmimi i tretë për “Dhoma “ Simfonia nga akti i parë i operë; 998 – Çmimi i parë për Operë “Dhoma” në Konkursin e shpallur nga Ministria e Kulturës dhe Teatri i Operës dhe Baletit.( nëntor 1998). Ermir Dergjini ka qenë një nga gjashtë protagonistët e parë në krijimin e shoqatës “Muzika e Re”. Në fushën e pedagogjisë ka botuar librin “Revolucioni elektronik” shkurt 2002. Ermir Dergjini do t’i mungojë familjes, studentëve dhe kolegëve të Akademisë së Arteve, do t’i mungojë dhe jetës artistike. Lamtumirë.