Incident në seksionin e PD-së në Kepenek të Tropojës

15/12/2008  Zgjedhjet për drejtuesin e ri të seksionit të Partisë Demokratike në një komunë të rrethit Tropojë janë shoqëruar me sherr. Mësohet se gjatë procesit të votimit për të caktuar drejtuesin e ri të seksionit ka pasur përplasje me personave brenda sallës dhe atyre që u futën në sallë. Në një prononcim për mediat, kreu i PD-së për komunën Kepenek Musa Halili ka thënë se gjatë zgjedhjeve për kreun e seksionit pati incidente, pasi policë dhe persona civilë kërcënuan me armë delegatët. Halili ka thënë se delegatët u nxorën jashtë nga salla. Sipas tij zgjedhjet për kreun e ri të seksionit u shtynë. Por sekretari Organizativ i Partisë Demokratike Flamur Noka, ka bërë me dije se nuk ka ndodhur asgjë shqetësuese. Sipas tij, dikush kërkonte me ngulm të zgjidhej në postin e kreut të seksionit dhe është shkaktuar një anomali. Noka hedh poshtë çdo mundësi për një përplasje të madhe dhe nënvizon se është diçka e fryrë dhe nuk ecën paralelisht me atë çka normalisht ka ndodhur. “Nuk është asgjë. Ajo është një sajesë e gjitha. Një anëtar PD-së i cili ka pretenduar të zgjidhet drejtues seksioni të fshatit, nuk është zgjedhur, nuk ka fituar, është grindur dhe ka ikur”, ka deklaruar sekretari Organizativ në Partinë Demokratike Flamur Noka.