Interi shënon fitoren e pestë

Interi e ka regjistruar fitoren e pestë radhazi nën drejtimin e Leonardos, pasi mposhti Cesenan në shtëpi me rezultat 3-2, ku ndër golashënuesit ishte dhe sulmuesi shqiptar Erjon Bogdani.

Nerazzurët e nisën më mirë takimin kur Samuel Eto’o me një goditje të ‘butë’ arriti ta zhbllokojë rezultatin (13’) për 1-0, duke zgjuar në këmbë tifozët Nerazzur.

Vetëm dy minuta më vonë (15’), u finalizua një aksion perfid i nisur nga Eto’o dhe i vazhduar nga Pandev, i cili tregoi klasin kur në mënyrë jo egoiste pasoi te Milito i cili natyrisht se nuk dështoi nga afërsia.

Mirëpo kur u mendua se për Interin kjo ndeshje do të jetë një ecje e lirë në natyrë, kështu nuk mendoi sulmuesi i kombëtares shqiptare Erjon Bogdani, i cili pasi tejkaloi Materazzin realizoi për 2-1 (23’).

Rikthimi sensacional i Cesenas kompletohet kur një top fenomenal i Jimenez gjen të lirë Giaccherinin që në mënyrë fenomenale (29’) shënoi për 2-2.

Mirëpo se Maicon vazhdon të mbetet mbrojtësi i djathtë më i mirë në planet, e tregoi asistimi i tij i tretë në tri ndeshjet e fundit, i cili e gjeti të lirë Christian Chivun që shënoi për 3-2 dhe epërsinë e merituar të Interit pas pushimit të pjesës së parë.

Në pjesën e dytë Interi luajti me formacion të përgjysmuar pasi u larguan lojtarët bazik, ndërsa Cesena pos përjashtimit të Giaccherinit (74’), nuk arriti të bëjë asgjë tjetër.

Interi me këtë fitore e sheh veten në pozitën e pestë me 35 pikë, vetëm dy pikë më pak se vendi i dytë Lazio që ka 37 pikë dhe vetëm gjashtë pikë më pak se Milani lider. Interi ka edhe një ndeshje më pak të zhvilluar.