Interpoli ekstradon 30-vjeçarin, tentoi të vriste në ‘99-ën

26/04/2005  Ekstradohet nga Zyra Qendrore Kombëtare Interpol Tirana, Arian Ndrevataj, 30 vjeç, nga Tropoja. Ky shtetas, sipas burimeve zyrtare të policisë, ka qenë i shpallur person në kërkim, pasi Gjykata e rrethit Gjyqësor Tropojë, me vendim të datës 16 korrik të vitit 2001, e ka dënuar me 12 vjet burg për "vrasje në tentativë". Arian Ndrevataj, më datë 5 tetor të vitit 1999, në vendin e quajtur Nimnaj, në qytetin e Bajram Currit, ka tentuar të vrasë shtetasin Q.A., duke qëlluar me armë zjarri në drejtim të automjetit me të cilin ai po udhëtonte. Arrestimi i këtij shtetasi në Greqi është kryer me qëllim ekstradimin e tij dhe vuajtjen e dënimit për krimin që ka kryer në vitin 1999 në vendin tonë. Pas arrestimit, ai do të dërgohet pranë autoriteteve të Tropojës, të cilët do të marrin masat përkatëse.