Investimet në shëndetësi, BB jep 19 milionë euro

 

Plot 19 milionë euro investime në shëndetësi. Projekte madhore pritet të vihen në jetë në sajë të fondit, që Banka Botërore i ka vënë në dispozicion Ministrisë së Shëndetësisë. Parashikohen të blihen 1500 ambulanca të reja, të pajisen me aparatura 6 qendra shëndetësore. Pos këtyre 7 spitale kryesore në vend do të kenë mundësi të eliminojnë brenda standardeve mbetjet spitalore. Nga ana tjetër do të realizohet depistimi i sëmundjes së kancerit të gjirit në popullatë me blerjen e mamografive. “Financimi i BB është një financim i madh që bëhet për Institutin e Sigurimeve Shëndetësore. Rreth 2 milionë dollarë do të investohen për pajisje mjekësore për 1500 ambulanca dhe për 6 qendra shëndetësore në të gjithë Shqipërinë si dhe për poliklinikat e Tiranës”, tha Saimir Kadiu, drejtor i shpërndarjes së buxhetit në Ministrinë e Shëndetësisë. Sipas tij, këto janë projekte që do të shënojnë një hap të rëndësishëm në zhvillimin e sistemit shëndetësor. “Mendohet që ky projekt do të financojë 1.5 milionë dollarë për blerje mamografish, në mënyrë që të bëhet depistimi dhe gjithë kontrolli i mundshëm në kuadër të luftës kundër kancerit”, tha Kadiu. Ai nënvizoi se një problem i madh janë dhe mbetjet spitalore dhe në këtë kuadër mendohet të blihen pajisjet e para për mbetjet spitalore me një fond prej 1.5 milionë dollarësh për 7 spitalet kryesore të vendit. Ndërkohë, sipas tij,  3.5 milionë dollarë nga fondi i përgjithshëm do të vihen në dispozicion të sistemit të informacionit të ISKSH-së. Kadiu tha se fondet e Bankës Botërore do të jenë aktive brenda muajit prill të këtij viti.