Italia rikthen racizmin, emigrantët në klasa veç

 

Dhoma Përfaqësuese në Itali ka miratuar një ligj të paraqitur nga partia e antiemigracionit, Lega Nord, i cili ka hapur polemika të forta pasi kthen segregacionin. Ligji u miratua 265 vota pro dhe 246 kundër, por pritet të kthehet për rishqyrtim, pasi ka pasuar me reagimin e ashpër dhe protestat e emigrantëve dhe të liderëve të opozitës italiane. Vendi është akuzuar nga Bashkimi Evropian për frymë raciste në trajtimin e emigrantëve edhe për ligje të mëparshme të miratuara nga qeveria e Berluskonit, pjesë e rëndësishme e së cilës është partia Lega Nord, e dalluar prej vitesh për frymën e saj kundër emigrantëve në Itali. Ligji i miratuar një ditë më parë nga Dhoma Përfaqësuese italiane kërkon të krijohen klasa të veçanta për të huajt në shkollat italiane. Ligji, i cili u miratua pas disa ndryshimeve, kërkon gjithashtu që hyrja e nxënësve nëpër klasa të bëhet sipas rregullave të reja, ku do të ketë teste të veçanta vlerësimi për fëmijët joitalianë. Në ligj thuhet se, nxënësit e huaj që nuk flasin apo flasin pak gjuhën italiane, do të hyjnë në të ashtuquajturat "klasat e hyrjes". Sipas kreut të grupit Lega Nord në Dhomën Përfaqësuese që paraqiti ligjin, Roberto Cota, propozimi "shërben për të parandaluar racizmin dhe kërkon realizimin e një integrimi të vërtetë", ndërsa për eksponentin e PD, Piero Fassino ky është "një propozim i ulët, që fut diskriminim nëpër shkolla".
Studentët e huaj në Itali do të futen në testet e veçanta para se të bëjnë testin përfundimtar të shkollës. Kush nuk i kalon testet paraprake do të futet në klasat e veçanta, të cilat do të japin përparësi mësimit të gjuhës italiane. Veç kësaj, futja e studentëve të huaj në klasat e zakonshme do të lejohet vetëm pas 31 dhjetorit të çdo viti. Sipas Legës, emigrantët nuk kuptojnë e pengojnë edhe studentët italianë në mësim. Ky ligj ka treguar edhe krisje të maxhorancës qeveritare në Itali. Lideri i PD, Valter Veltroni e ka konsideruar ligjin të patolerueshëm. "Zoti na shpëtoftë nga ideja e klasave të ndara", është shprehur kreu i PD në Itali, Veltroni. "Argumentet e dhëna janë absolutisht absurde. Të jetë e qartë se për këto që përpiqet ta kthejë në ligj një mocion të tillë, PD do të përdorë çdo mjet për ta ndaluar iniciativën", tha ai.