Ivanov flet me Topin:S’mjafton shkarkimi i një oficeri grek

Presidenti i Republikës, Bamir Topi, zhvilloi një bisedë telefonike me homologun e tij maqedonas, Ivanov, ku dy krerët e shteteve kanë ndarë shqetësimin mbi ngjarjen e ndodhur në paradën ushtarake në Greqi, ku këndoheshin këngë fyese për shqiptarët, maqedonasit e turqit. Në këtë bisedë telefonike të kërkuar nga Presidenti maqedonas, Topi tha se kjo ngjarje nuk do të prekë marrëdhëniet mes Greqisë e Shqipërisë, duke e cilësuar atë si një çështje të tejkaluar. "Gjatë bisedës, Presidenti Ivanov shprehu shqetësimin për situatën e krijuar nga sjellja e disa ushtarëve grekë ditët e fundit ndaj vendeve fqinje. Topi i bëri të ditur Ivanovit se e konsideron atë si një ngjarje të izoluar, e cila nuk prek kurrsesi marrëdhëniet e mira që ekzistojnë midis Shqipërisë dhe Greqisë dhe e konsideron atë si një çështje të tejkaluar, i bindur se marrëdhëniet mes vendeve tona po zhvillohen gjithnjë e më mirë në funksion të interesave të përbashkëta", - thuhet në njoftimin zyrtar të Presidencës, duke shtuar më tej se Topi vlerësoi edhe ndjesën e autoriteteve greke për ngjarjen. Ndërkaq, bisedën me Presidentin Topi e ka komentuar për mediat maqedonase kreu i shtetit maqedonas, Ivanov. "Për momentin, kur të gjithë presim të jemi të bashkuar dhe të përqafojmë standardet e vlerat evropiane, pikërisht kjo shqetëson edhe Presidentin Bamir Topi. Neve ndamë mendime të përbashkëta për këtë rast dhe nuk mjafton vetëm shkarkimi i një oficeri. Mendoj se është koha jo vetëm për shkarkime, por edhe për ndryshimin e sjelljes së Greqisë me fqinjët e saj, këtë presim prej tyre", deklaroi Presidenti Ivanov. Ai tha gjithashtu më tej se, ngjarja ishte shqetësuese dhe prek ndjenjat e shqiptarëve dhe maqedonasve.

PDU vlerëson Topin për çamët
Partia për Drejtësi e Unitet vlerësoi deklaratën e Presidentit Bamir Topi për nderimin e viktimave të komunitetit çam. "Na gëzon, sepse përbën një shenjë të mirë, të ardhur nga goja e kryetarit të shtetit shqiptar, por njëkohësisht na hidhëron, sepse na bën të kujtojmë se politika shqiptare sillet si fajtore në raport me Greqinë për çështjen çame e jo si shteti ku sot banojnë viktimat e vërteta të asaj tragjedie", - thuhet në deklaratë.

Flamuri grek digjet në Vlorë
Revolta spontane ndaj thirrjeve antishqiptare në kryeqytetin grek u pasua dje nga një grup të rinjsh në qytetin e Vlorës. Ata u grumbulluan në orët e mbrëmjes në "Sheshin e Flamurit", ku pas një proteste disaminutëshe, i vunë flakën flamurit të shtetit fqinj. Kjo protestë pasoi ato të zhvilluara në disa qytete të vendit, menjëherë pas publikimit të videos së ushtarëve grekë.