Jordanezi Ramzeh Rayyan, kallëzim penal Hekuran Vladit

Agjencia e Administrimit të pasurive të sekuestruara e konfiskuara e caktoi kryekomisioner për pronat e Yassin Kadisë. Administratori i tij e akuzon për “shpërdorim detyre”

Hamzeh Abu Rayyan ka depozituar në Prokurorinë e Tiranës një kallëzim penal në ngarkim të shtetasit Hekuran Vladi, të cilin e akuzon për veprën penale të “shpërdorimit të detyrës”. Administratori jordanez i pronave të Yassin Kadisë kallëzoi penalisht kryekomisionerin që është caktuar nga ana e Agjencisë së Administrimit të pasurive të sekuestruara dhe konfiskuara. Sipas kallëzimit penal, bëhet e ditur se Vladi ka ushtruar presion mbi qiramarrësit duke u bërë me dije se nëse nuk firmosnin kontratat do të përfundonin në polici. Po sipas Rayyanit, ka ushtruar edhe kontrolle të herë pas hershme në këto objekte nga ana e policisë tatimore. Nëpërmjet këtij kallëzimi penal, Hamzeh Abu Rayyan i kërkon Prokurorisë së Tiranës ndjekjen e tij penale për “shpërdorimin e detyrës”. Ndërkohë që, dy ditë më parë, togat e zeza të Shkallës së Parë për Krime të Rënda kanë pranuar kërkesën e jordanezit të pandehur, për të thirrur si dëshmitar kryekomisonerin Vladi dhe të tjerë persona që kanë punuar në këtë agjenci. Togat e zeza rrëzuan kërkesën e tij për thirrjen e tyre si dëshmitarë të ish-ministrit të Financave, Arben Malaj dhe atij aktual Ridvan Bode.

Akuza

Drejtoria e Përgjithshme e Parandalimit të Pastrimit të Parave më 10 gusht të vitit 2006 ka bërë kallëzim në ngarkim të shoqërisë “Lloxhall” sh.p.k. me administrator jordanezin Hamzeh Abu Rayyan. Pronari i kësaj shoqërie ka rezultuar të jetë një emër jo pak i njohur për drejtësinë shqiptare, ai i Yassin Kadisë, i cili ndodhet që nga data 17 tetor në vitin 2001 në listën e OKB-së, si i dyshuar për financim terrorizmi. Sipas Prokurorisë së Krimeve të Rënda, edhe pse shteti shqiptar ka urdhëruar sekuestrimin e aseteve të Yasim Kadisë, kjo shoqëri ka vazhduar aktivitetin. Gjatë hetimit, prokuroria ka konstatuar se kjo shoqëri vazhdonte punën e saj nëpërmjet dhënies me qera të pasurive të paluajtshme pronë e saj. Gjithsej në Tiranë kanë rezultuar 19 objekte, të cilat janë dhënë me qera. Veçori e këtij aktiviteti qiradhënës, sipas hetuesve, është se pagesat e qerave përkatëse janë kryer të gjitha në kesh dhe nuk kanë kaluar nëpërmjet sistemit bankar. Në kuadër të hetimeve, janë marrë deklarime nga të gjithë qiramarrësit e “Loxhall”, të cilët deklarojnë vlerën e qerasë për objektet përkatëse si dhe konfirmojnë faktin se pagesat e qerasë janë bërë të gjitha në kesh. Sipas prokurorisë, i pandehuri Rayyan ka marrë dijeni për vënien nën sekuestro të shoqërisë nga ana e Ministrisë së Financave dhe ai në mënyrë aktive duke vazhduar aktivitetin. Me mbylljen e hetimeve, Prokuroria e Krimeve të Rënda ka vendosur ta pushojë akuzën për financim terrorizmi duke lënë vetëm atë të “fshehjes së fondeve dhe pasurive ndaj të cilave zbatohen masat kundër financimit të terrorizmit”.