KIEV – Zelensky: Bisedime të reja paqeje me zyrtarët amerikanë

KIEV, 7 maj /ATSH-DPA/ – Ukraina ka njoftuar bisedime të reja me Shtetet e Bashkuara si pjesë e përpjekjeve për t’i dhënë fund luftës, me presidentin Volodymyr Zelensky që tha se sekretari i Këshillit të Sigurisë Kombëtare Rustem Umerov do të takohet sot me përfaqësuesit amerikanë.

Zelensky tha se diskutimet synojnë të çojnë përpara procesin diplomatik, duke u përqendruar në shkëmbimet e mundshme të të burgosurve Rusi-Ukrainë dhe bashkëpunimin më të gjerë të sigurisë midis Kievit dhe Uashingtonit.

Zelensky shtoi se Ukraina mbetet në kontakt të ngushtë me partnerët amerikanë dhe po shtyn për një paqe dinjitoze, ndërsa akuzoi Rusinë se nuk i është përgjigjur në mënyrë konstruktive propozimeve të Kievit për armëpushim.

I dërguari special i SHBA-së, Steve Witkoff, pritet të marrë pjesë në bisedime, të cilat do të zhvillohen në Miami.

Negociatat midis Kievit dhe Moskës kanë ngecur, pavarësisht ndërmjetësimit të mëparshëm të SHBA-së, me vëmendjen pjesërisht të devijuar nga lufta e SHBA-së kundër Iranit.

Ukraina, e cila ka qenë duke u mbrojtur nga pushtimi i Rusisë për më shumë se katër vjet, i dha fund një armëpushimi të vetimponuar me Moskën vetëm pas një dite këtë javë.

Kievi iu përgjigj sulmeve të vazhdueshme ruse me një nga sulmet e saj më të mëdha me dronë deri më sot, pasi Moska refuzoi të ndalonte armiqësitë.

Ndërkohë, Rusia ka njoftuar një armëpushim të veçantë dyditor për festimet e 9 majit që shënojnë fitoren sovjetike ndaj Gjermanisë naziste.

Mbetet e paqartë nëse Ukraina do t’i përmbahet këtij armëpushimi./ a.jor.