KIPRED: Kosova të ndahet në 7 zona zgjedhore
Instituti KIPRED ka studiuar zhvillimin e sistemit elektoral në Kosovë për një kohë të gjatë. Një studim më i thellë është bërë në vitin 2011. Janë analizuar të arriturat por edhe mangësitë e sistemit, janë analizuar manipulimet dhe abuzimet që janë vërejtur në zgjedhjet e fundit si dhe janë analizuar rekomandimet më të shpeshta për atë se çfarë duhet të ndryshohet në sistemin elektoral të Kosovës. “Rezultat i kësaj pune është raporti që publikohet sot ‘Zgjedhje në shërbim të qytetarëve’. Edhe pse sikur të respektoheshin ligjet për partitë politike dhe për zgjedhjet edhe sistemi i tashëm elektoral do të siguronte përfaqësim të drejtë të të gjitha grupeve në Kosovë, për shkak të parregullsive që janë shfaqur sidomos në zgjedhjet e fundit, KIPRED e ka parë të nevojshme që të bëhen disa ndryshime në sistemin elektoral”, thuhet në një komunikatë të Insistutit KIPRED.
Sipas tyre, nevojën për ndryshime e kanë theksuar edhe përfaqësues të tjerë nga shoqëria civile por edhe vet partitë politike.
Përderisa Komisioni parlamentar për ndryshimin e Ligjit për Zgjedhjet do të fillojë me procesin e përpilimit të rekomandimeve, KIPRED e inkurajon që këtë ta bëjë duke pasur interesin e qytetarëve në rend të parë.
“Një nga ndryshimet më të diskutuara është ndarja e Kosovës në disa zona elektorale. Një ndryshim të tillë e kanë paralajmëruar edhe disa nga partitë më të mëdha në Kosovë. PDK, LDK dhe AKR, me marrëveshjen politike mes tyre për zgjedhjen e presidentit në prill të vitit 2011 ishin marrë vesh edhe që Kosova të ndahet në disa zona elektorale”, vazhdon komunikata e KIPREDI-it, i cili konkludon se zgjidhja më e mirë për Kosovën është që të ndahet në 7 zona.
Kjo ndarje, sipas tyre, do të sigurojë që të gjitha qendrat kryesore urbane të kenë përfaqësim në Kuvendin e Kosovës; pasi kandidatët do të mund të kandidonin vetëm në një zonë, kjo do të mundësojë që kandidatë të tjerë të dalin në skenë në zonat tjera.