KSHH: Burgjet shqiptare s‘plotësojnë kushtet

 

TIRANE – Burgjet shqiptare kanë mangësi për sa i përket respektimit të së Drejtave të Njeriut. Ky është përfundimi me të cilin ka dalë Komiteti Shqiptar i Helsinkit pas përfundimit të një vëzhgimi në periudhën tetor-dhjetor të vitit të kaluar paraburgimet: “Jordan Misja” e “Mine Peza”, në Tiranë; Berat; Durrës e Vlorë, si edhe burgjet: “Shën Koll”, Lezhë; Fushë-Krujë; Krujë; si dhe Vaqar, “Ali Demi” dhe Spitali i Burgjeve në Tiranë. Sipas KSHH-së, qëllimi i monitorimeve ishte vlerësimi i situatës së të drejtave të personave të paraburgosur në përgjithësi, i kushteve fizike të jetesës nëpër institucione, i atmosferës së përgjithshme që mbizotëronte në këto institucione, kujdesi social dhe shëndetësor që ofrohej në këto institucione, si edhe aspekte të tjera që lidhen me të drejtat e të paraburgosurve dhe të dënuarve në përgjithësi. Problemi i parë i vërejtur nga  vëzhguesit ishte mbipopullimi, fakt ky konkret prej shumë vitesh në të gjithë institucionet e burgjeve. “Në disa prej institucioneve kishte mungesë të energjisë elektrike dhe të ujit të rrjedhshëm 24 orësh dhe godinat ishin totalisht të amortizuara dhe me lagështirë, gjë që ndikon drejtpërdrejt në shëndetin e personave të privuar nga liria. Në Rrogozhinë dhe në Burrel, në sektorin e paraburgimit, në një dhomë mund të qëndronin nga 6 deri në 12 vetë” thuhet në raportin e KSHH-së. Më tej, theksohet higjiena e ambienteve të brendshme ishte një tjetër problem i konstatuar, si dhe në disa burgje nuk funksiononin dushet e përbashkëta apo ishin në gjendje të amortizuar sendet personale. Ndërkohë, që janë gjetur raste kur të burgosurit flinin në dysheme, ndërsa ka pasur mungesa të theksuara të personelit mjekësor.            fa.ma.