Kampionati gjerman i futbollit zbret sot ne fushe me ndeshjen Hofenhajm-Mainc

Nuk do të jetë një nga ndeshjet kryesore, por atmosfera do të jetë si gjithnjë e klasit më të lartë. Hofenhajm-Mainc është ndeshja që i hap derën javës së 22-të të Bundesligës gjermane dhe në një stadium të shkëlqyer, spektakli nuk mund të mungojë.

Janë dy të papriturat e këndshme të viteve të fundit të kampionatit, por që këtë herë po rrëshqasin rrezikshëm drejt pjesës së poshtme të tabelës. Vetëm dy pikë i ndajnë rivalët, por Hofenhajm është më i favorizuar, pasi luan në shtëpi.

Peshat e rënda do të zbresin në fushë të shtunën, pra nesër. Kampionia dhe kryesuesja Dortmund luan në fushën e Hertës në Berlin, aty ku bilancin e viteve të fundit nuk e ka shumë të mirë. Gjithsesi, forma e verdhezinjve është e mrekullueshme.

Gjithashtu, në 15:30 të së shtunës luan Borusia e Mynshengladbahut në fushën e Kaizerslauternit dhe miqtë po e tregojnë veten seriozë nga java në javë.

Bajerni do të japë shfaqje pak më vonë, në orën 18:30, në Frajburg, një stadium ku vitet e fundit ka fituar edhe 6, madje edhe 7 me zero. Ndoshta fiton bindshëm edhe këtë herë.

Të dielën, Shalke mbyll programin e ndeshjeve të ekipeve të mëdhenj, pasi pret në Gelsenkirshen Volfsburgun ambicioz, por edhe problematik.

Dortmund kryeson me 46 pikë, Bajern ka 44, Mynshengladbah 43 dhe Shalke 41 pikë.