Kartat, aplikojnë afro 1 milion e gjysmë shtetas

Me afrimin e skadimit të afatit ligjor, Ministria e Punëve të Brendshme njofton se numri i aplikantëve për kartat e identitetit ka kaluar mbi një milion e 300 mijë persona. Por edhe pas shifrave të kënaqshme, zëvendësministri i Brendshëm, Ferdinand Poni, u bëri apel shqiptarëve që të vazhdojnë procesin e aplikimit deri në pajisjen me dokumentin e identifikimit elektronik. Ai bëri dje thirrje për tërheqje të kartave. “Numri i aplikantëve ka arritur në 1 milion e 366 mijë persona. Ministria e Brendshme përfiton nga rasti që edhe në këtë moment të kënaqshëm të kërkojë vëmendjen e qytetarëve për të vazhduar procesin e aplikimit dhe për të tërhequr kartat”, - deklaroi z. Poni. Zëvendësministri i Punëve të Brendshme njoftoi për ecurinë e procesit të pajisjes së shtetasve duke publikuar dhe shifra të tij. Bazuar në informacionin e marrë deri me datë 9 qershor 2009, informacioni për procesin e aplikimit për letërnjoftime elektronike është: Numri total i aplikimeve, 1.306.842. Numri i i aplikimeve me 09.06.2009, është 15.481. Numri i letërnjoftimeve të prodhuara, është 1.187.378, numri total i letërnjoftimeve të shpërndara pranë zyrave të gjendjeve civile është 1.160.844 dhe numri total i letërnjoftimeve te tërhequra nga qytetarët është rreth 850 mijë shtetas. Kurse numri total i letërnjoftimeve të tërhequra me 09.06.2009 sipas Ministrisë së Punëve të Brendshme, ka arritur shifrën e 23.086 shtetasve. Ministria e Brendshme bën të ditur se kompania “Aleat” ka të gjitha këto kapacitete dhe mundësi maksimale për t’u ofruar shqiptarëve sasinë e duhur të dokumentit të identitetit, duke apeluar se të gjithë ata që nuk e kanë një pasaportë, duhet të paraqiten sa më parë në zyrat e aplikimit.

Gjithashtu, të gjithë ata qytetarë që kanë aplikuar për letërnjoftimin deri më datën 24 maj 2009, të paraqiten për ta tërhequr atë. Ministria e Brendshme bëri të ditur: “Ne i kemi të gjitha mundësitë që çdo qytetar që paraqitet për të aplikuar apo për të tërhequr kartën, ta ketë atë në disponim përpara ditës së zgjedhjeve”.