Kartat, debate në Kuvend mes Leskajt dhe Patozit

Kuvendi iu rikthye dje debatit politik për pajisjen e shtetasve shqiptarë me karta identiteti. Mazhoranca dhe opozita, nëpërmjet kryetarëve të grupeve parlamentare, Astrit Patozi dhe Valentina Leskaj, replikuan ashpër me njëri-tjetrin. Kryetarja e grupit parlamentar të PS-së, Valentina Leskaj, theksoi se tashmë vëmendja e qeverisë duhet të kthehet seriozisht nga zgjedhjet, pasi procesi është në rrezik. Dhe shteg për këtë rrezik, theksoi ajo, është mospajisja e qytetarëve me karta identiteti. Proces, i cili tha Leskaj, po shkon drejt dështimit. Gjatë diskutimit të saj në gjashtëdhjetë minutësh, drejtuesja e deputetëve socialistë theksoi se "zgjedhjet janë në rrezik pa karta identiteti. Mbetet e hapur çështja nëse kjo qeveri ka vullnet për zgjedhje të lira e të ndershme apo jo. Qytetarët kanë të drejtën e tyre për të marrë pjesë në zgjedhje". Bota, sqaroi Leskaj, ka kohë që e ka hequr taksën që Shqipëria ka bërë për kartat e identitetit. "Është e vërtetë që është bërë një ulje, por prapë familjet e varfra duhet të bëjnë një parapagim", konstatoi ajo. Pretendimi i Leskajt u kundërshtua nga kryetari i grupit parlamentar të PD-së, Astrit Patozi. Ai bëri përgjegjës kryetarin e PS, Edi Rama, i cili, u shpreh Patozi, po e kthen një problem personal në një problem kombëtar. "Unë kam dëgjuar ankimin e kreut të PS. Është fatkeqësi kur një kryetar partie hallin e tij kërkon ta kthejë në një problem për gjithë Shqipërinë. Vetëm një kryetar i papërgjegjshëm mund ta çojë partinë me vajtim në zgjedhje, vetëm një kryetar i papërgjegjshëm e shndërron një problem personal në problem për të gjithë vendin", theksoi Patozi. Sipas tij, pajisja e shtetasve me karta identiteti po shkon normalisht dhe procesi do të shkojë sipas të gjitha afateve të përcaktuara nga qeveria. Ky pretendim u kundërshtua nga deputetët e opozitës, Fatmir Xhafaj dhe Kastriot Islami, të cilët përmendën disa nga problemet që ky proces po has, duke dhënë alarmin se zgjedhjet po shkojnë drejt dështimit.