Kartat, “digjet“ rimbursimi për pensionistët që nuk aplikojnë brenda datës 20 qershor
Pensionistët që nuk do të aplikojnë për kartë identiteti brenda datës 20 qershor, nuk do ta përfitojnë rimbursimin e akorduar nga qeveria. Sipas vendimit të marrë nga Këshilli i Ministrave pak kohë më parë, pagesa e kompensimit do të jetë e vlefshme për aplikimet e kryera deri në datën 20 qershor 2009, apo për letërnjoftimet deri në 28 qershor 2009. Për aplikimet e bëra pas datës 20 qershor 2009, kompensimi është i pavlefshëm dhe çdo pagesë e marrë për këtë qëllim është e paligjshme. Për të bërë të mundur pajisjen e të gjithë pensionistëve pa pasaportë me kuponin e pajisjes me kartë identiteti që nga 1 maji 2009, si dhe rimbursimin e të gjithë atyre që kanë aplikuar përpara kësaj date për letërnjoftimin, ISSH-ja dhe Posta Shqiptare, bazuar në vendimin 336 të Këshillit të Ministrave, datë 15/04/2009, kanë nënshkruar një marrëveshje të përbashkët.
Sipas marrëveshjes, pensionistët që nuk kanë aplikuar ende do të pajisen me kuponin e kartës së identitetit ditën e marrjes së pensionit. Ndërkohë, personat që e kanë kryer aplikimin apo e kanë marrë letërnjoftimin do të marrin kompensimin, në masën e njohur në muajin pasardhës, pasi të kenë dorëzuar në zyrat e tërheqjes së pagesës mujore të pensionit kopjen e formularit të aplikimit ose kopjen e letërnjoftimit të marrë. Pensionistët që janë pa pasaportë dhe pensionistët e fshatit, do të rimbursohen me 1000 lekë, ndërsa ata që përfitojnë pension pleqërie mbi pensionin minimal, do të rimbursohen me 400 lekë. Shuma prej 200 lekësh, do t’u mbahet pensionistëve në momentin e tërheqjes së pensionit. Afrimi i ditës së mbarimit të afatit për aplikimin për kartë si dhe penalizimet e vendosura nga qeveria për pensionistët që nuk aplikojnë ka bërë që ditët e fundit pensionistët të dynden në zyrat postare për prerjen e kuponit.
Skema e kompensimit
1000 lekë do të rimbursohen pensionistët që janë pa pasaportë dhe pensionistët e fshatit që përfitojnë pension minimal
400 lekë do të rimbursohen pensionistët që përfitojnë pension pleqërie mbi pensionin minimal
200 lekëshi, do t’u mbahet pensionistëve në momentin e tërheqjes së pensionit
20 qershor është afati i fundit për të përfituar nga pagesa e kompensimit
9 Qershor 2009