Kërcënojnë me grevë

Pas premtimeve për shërbyesit civilë e kategoritë e tjera, janë çuar peshë edhe punëtorët e KEK’ut. Nëse nuk iu rriten pagat 30 për qind, atëherë vendin, sipas tyre, do ta vërshojnë protestat e grevat. Por, drejtuesit e korporatës thonë se rritje të pagave nuk do të ketë. Nga Albulena Maloku më 05 janar 2011 në ora 08:30

Punëtorët e Korporatës Energjetike të Kosovës nuk do ta kenë kënaqësinë që pagat e tyre këtë vit t’i marrin me rritje si shërbyesit civilë. Ata paralajmërojnë protesta e greva në rast të mosrealizimit të kërkesave të tyre. Sindikata e Punëtorëve të KEK’ut do t’ia dorëzojë Bordit të kësaj korporate kërkesën e tyre për ngritje pagash për 30 për qind. Në anën tjetër, udhëheqës të kësaj ndërmarrjeje publike thonë se nuk kanë mundësi buxhetore për ngritjen e pagave.

Drejtori i KEK’ut, Arben Gjukaj thotë se në këtë vit kanë marrë shkurtime të mëdha buxhetore.

“Shkurtimet buxhetore të parapara nga qeveria tregojnë se mundësitë janë të vogla për rritjen e pagave. Edhe nëse punëtorët çohen në protesta, nuk do të kemi mundësi të bëjmë këtë rritje për shkak të këtyre shkurtimeve”, thotë Gjukaj. Ai tregon se paga mesatare e punëtorëve të kësaj ndërmarrjeje publike është 480 euro. Sindikata e Punëtorëve të KEK’ut javën e kaluar ka mbajtur kongresin zgjedhor dhe janë zgjedhur organet e reja legjitime, të cilat edhe kanë dalë me kërkesën për rritje pagash për 30 për qind të pagës bazë.

Shkrimin kryesor mund ta lexoni në Express...