Kili e Uruguai, në çerekfinale
Kili dhe Uruguai janë dy skuadrat tjera që e kanë siguruar kualifikimin në çerekfinale të Copa Americas. Këtyre dy skuadrave u mjaftoi fitorja minimale me rezultat identik 1:0 përballë Perusë, respektivisht Meksikës, për ta mbyllur fazën e grupeve në pozitën e parë dhe të dytë.
Kilianët e mbyllën fazën e grupeve pa pësuar asnjë humbje, me një fitore e dy barazime. Një autogol i Diaz në minutën e fundit i kushtoi me eliminim Perusë, në një ndeshje dramatike dhe të ashpër me Kilin.
Gjatë ndeshjes, më saktësisht në pjesën e dytë, nga loja ishin përjashtuar Beausejour (Kili) e Carmona (Peru), për shkak të një përleshjeje në mes vete. Humbjen e Perusë e shfrytëzoi si është më së miri Uruguai, i cili falë golit të Alvaro Pereiras, e mposhti Meksikën, për të ecur tutje.
Meksikanët, të cilët në këtë eveniment ishin mysafirë në vend të Japonisë, e pësuan humbjen e tretë dhe u kthyen në shtëpi. Duhet cekur se ata luajtën me përbërjen e dytë në Copa America.
Në çerekfinale, Uruguai do të përballet me Argjentinën. Selektori uruguaian Oscar Tabarez qysh tash po mendon për këtë duel. Argjentinën ai e konsideron si kundërshtar mjaft të vështirë. “Asgjë nuk është e shkruar para ndeshjeve, por është një kundërshtar i vështirë, do të duhej të përballeshim me të herët ose vonë”, tha Tabarez pas ndeshjes.
64 vjeçari shpreson që ekipi i tij të ecën përpara, njëjtë siç bëri në Botërorin 2010, kur arriti deri në gjysmëfinale. Njëherësh, Argjentina dhe Uruguai janë dy skuadrat më të suksesshme në Copa America.
Grupi C
Kili – Peru1:0
Uruguai – Meksika1:0
Tabela
1. Kili7 pikë
2. Uruguai5
3. Peru4
4. Meksika0