Kina, operohet një “djalë breshkë”

Maimaiti Hali, nga Kina, prej tetë vitesh ka jetuar me një “zhguall breshke” në kurriz, për shkak të një deformimi që në lindje. Fëmijët e tjerë e thërrisnin djali-breshkë, pasi në kurrizin e tij kishte një shtresë të fortë lëkure të mbuluar me qime. Por problemi i tij me sa duket mbaroi falë një operacioni kirurgjik që zgjati dy orë. Mjekët e Spitalit të Përgjithshëm Ushtarak në Urumqi, pothuajse kanë bërë një mrekulli. Sipas britanikes “The Sun”, babai i Maimaiti Musai u shpreh i kënaqur. “Hali nuk e duronte dot më të tallej nga moshatarët e tij”, tha ai, duke falënderuar mjekët. Sipas Ye Xiangpo, kryekirurgu i operacionit delikat, nuk e konsideroi një punë të lehtë, pasi “Lëkura e hequr ishte si ajo e demave. Ndërsa për sipërfaqen e re të kurrizit përdorëm lëkurë koke, e cila rritet me shpejtësi”. Ndërsa djali tha se “tani mund të heqë lirisht bluzën, të shkojë në pishinë e të notojë pa pasur frikë se të tjerët do të qeshin me mua”.