Kirurgët italianë asistojnë prej 10 vjetësh ndërhyrjet kirurgjikale tek fëmijët shqiptarë

Ministrja e Shëndetësisë, znj. Anila Godo, takoi dje ekipin e urologëve pediatër italianë, i cili prej 10 vjetësh asiston pediatrinë shqiptare me kryerjen e ndërhyrjeve të vështira tek fëmijët. Ekipi përfaqësohej nga Kirurgë të njohur Italianë, Gianantonio Manzoni, nefrologu Maurizio Bozio dhe kirurgu anglez Philip Ransley, i njohur si shef i “Great Hormon Street Hospital“ në Angli. Ministrja e Shëndetësisë, falënderoi ekipin e kirurgjisë pediatrike për asistencën e tyre mjaft të dobishme në këtë fushë. Gjithashtu, znj.Godo vuri theksin në bashkëpunimin e mëtejshëm me këtë ekip për nevojat e shërbimit pediatrik në Shqipëri. Në këtë takim, u diskutua për bashkëpunimin në transplantin e veshkave që mund të kryhet në shërbimin pediatrik. Ministrja e Shëndetësisë, Anila Godo, u dha mbështetjen maksimale për vënien sa më shpejt në jetë të këtij shërbimi në spitalin tonë. Doktor Gianantonio Manxoni tha për mediat se dje, ekipi i mjekëve ka operuar një vajzë 14 vjeçare për nëntë orë me një keq transformim kompleks të inkontinëncës urinale. Dr.Manxoni, duke iu referuar takimit me ministren Godo e theksoi si; “një pikë të rëndësishme të diskutimeve në takim dhe transplantin e veshkës, që në Shqipëri ndoshta mund të fillojë një program për trasplantin renal”. Doktor Manxoni dhe ekipi Italian prej 10 vjetësh kryejnë ndërhyrje të vështira dhe numri i personave që kanë operuar deri tani është në shifra të mëdha. “Janë fëmijë që presin çdo vit kirurgët të vijnë të operojnë, dhe mbeten ende fëmijë për radhët e ardhshme”, tha kirurgu pediatër Dritan Alushani, i cili është pjesë e ekipit të kirurgjisë pediatrike. “Fëmijët operohen nga anomali dhe kongjenitale të lindura të cilat janë të rralla ose të shpeshta. Janë raste të rralla që I shohim shpesh dhe nuk kemi ekspertizën e duhur si kirurgë dhe në këtë rast, ne kemi thirrur ekspertët e huaj”, tha dr. Alushani. Ndër rastet që operohen ai përmendi anomalitë në lindje të tilla, si në rastin kur fshikëza e urinës mbetet e hapur dhe nuk mbyllet dhe që kanë nevojë për një seri interventesh, si dhe për në raste të deformimeve gjenetike. Ekipi i mjekëve italianë asiston çdo vit vendin tonë me kryerjen e operacioneve më problematike tek fëmijët. Në vendin tonë, regjistrohen rreth 300 raste në vit të ndërhyrjeve tek fëmijët, ndër të cilat rreth 15 asistohen nga mjekët italianë. ...