Klitschko nokauton Solisin në raundin e parë

Vitali Klitschko mbrojti titullin e tij në kategorinë e rëndë të versionit WBC me fitore me nokaut, në raundin parë, ndaj Odlanier Solisit, i cili lëndoi gjurin gjatë rrëzimit dhe insistoi se ishte kjo, e jo goditja e kampionit, ajo që përfundoi meçin të shtunën. Solis arriti t’i shpëtojë numërimit, por ishte i pasigurt në këmbë dhe gjyqtari Jose Guadalupe Garcia nga Meksika e sinjalizoi përfundimin e përballjes.

“Nuk ishte lehtë në fillim. Solis ishte mjaft i shpejtë, por mori një goditje të fortë nga unë. Më vjen keq për të gjithë ata që kishin dashur të shohin një përballje më të gjatë”, tha Klitschko në intervistën e tij në ring, në mes të vërshëllimave nga publiku në arenën e mbyllur në Koln.

“Ishte gjuri im. Mund të ketë ndodhur për shkak se kisha bërë një hap të gabuar”, tha Solis nga Kuba. Promotori i tij, Ahmet Oner, insistoi se ishte lëndimi e jo goditja e Klitschkos ajo që e përfundoi meçin.

“Ai do të kontrollohet e me gjasë edhe do të duhet të operohet. Duket se ka çarë ligamentet”, tha Oner. Solis, 30 vjeç pësoi humbjen e parë në 18 meçet e tij si profesionist ndërsa 39-vjeçari Klitschko përmirësoi bilancin e tij në 42-2. Vëllai më i ri i Vitalit, Wladimir, kampion i versioneve IBF, WBO do të takohet me bartësin e brezit nga WBA, David Haye në qershor ose korrik. Solis, kampion olimpik nga viti 2004, kishte mposhtur Hayen për njërin prej titujve të kampionit të botës si amator.