Kodheli: Iliri, shpresa e fundit për Berishën

Selia rozë ka pritur me indiferentizëm deklarimet e Kryeministrit Sali Berisha dhe ish-kryeministrit Ilir Meta. Zëdhënësja e Kryesisë së Partisë Socialiste, Mimi Kodheli, u prononcua direkt teksa shoi shpresat e Lëvizjes Socialiste për Integrim të Ilir Metës. "Nuk na çudit fare shfaqja e dyfytyrësisë së radhës që Sali Berisha dha sot duke i qarë hallin Ilir Metës", tha Kodheli. Sipas saj në derexhenë ku është katandisur Kryeministri, Iliri është vërtet shpresa e fundit që i ka mbetur për të spostuar vëmendjen e opinionit publik nga skandalet e tmerrshme të korrupsionit qeveritar. "Përgjigjja jonë është e thjeshtë: Parlamenti duhet të votojë pa humbur kohë vetëm për dekretin e Presidentit", këmbënguli Kodheli. Të tjerat, vijoi ajo, janë politikë e vjetër kulisash e diversionesh që Saliu dhe Iliri mund të vazhdojnë t‘i bëjnë njëri-tjetrin. Drejtuesit e Lëvizjes Socialiste për Integrim bënë publikisht një replikë mbi replikën. Sekretari i përgjithshëm, Petrit Vasili, e cilësoi reagimin e Partisë Socialiste si irracional. "PS nuk duhet të jetë shkaku i krizës. Standardet duhet të jenë mbi interesat e ngushta", u shpreh Vasili. Teksa ngulmoi se ftesa e Ilir Metës për kreun socialist, Edi Rama, mbetet e hapur. Deklarimet dhe kundërdeklarimet mes Kodhelit dhe Vasilit duket se i shërbejnë veçse acarimit të mëtejshëm të marrëdhënieve brenda bllokut të së majtës. Situatë që po shfrytëzohet më së miri nga Kryeministri Sali Berisha për të fituar terren politik.