Kombet e Bashkuara ndihmë 270 mijë dollarë

12/01/2010  Për banorët në veri të vendit
Një tjetër ndihmë financiare vjen për banorët në veri të vendit, shtëpitë e të cilëve janë përmbytur gjatë ditëve të fundit. Kombet e Bashkuara në Shqipëri kanë ofruar një shumë prej 270 mijë dollarësh, pasi kanë ndjekur të shqetësuar situatën në të cilën ndodhet popullata e prekur. “Kemi parë frymën e solidaritetit me të cilën qeveria dhe institucione të tjera po i përgjigjen kësaj situate, përfshi mbështetjen e dhënë në kohë nga komuniteti ndërkombëtar. Kombet e Bashkuara i bashkohen përpjekjes mbarëkombëtare për të tejkaluar këtë kohë të vështirë”, - thotë Gulden Turkoz-Cosslett, Koordinatorja e Përhershme e Kombeve të Bashkuara në Shqipëri. Kontributi do të jetë në formën e parave kesh si grant emergjent. Veç kësaj, një anëtar i ekipit të Kombeve të Bashkuara për Vlerësimin dhe Koordinimin e Katastrofave (UNDAC) ka mbërritur në Tiranë si pjesë e misionit të BE-së për monitorim dhe informim, në mbështetje të nevojave urgjente të qeverisë. Gjithashtu, sipas burimeve zyrtare nga kjo zyrë, një ekspert tjetër anëtar i UNDAC, do të jetë në dispozicion të Ministrisë së Brendshme për një periudhë tre javore, për të lehtësuar koordinimin kombëtar të asistencës ndërkombëtare pranë Departamentit të Emergjencave Civile.