Kombëtarja U-19 mund Vllaznimin dhe i mban sytë nga San Marino

Kombëtarja U-19 fiton testin e parë në Maqedoni. Përfaqësuesja e ekipit të moshave, e cila drejtohet nga trajneri Ramadan Shehu ka marrë një fitore 2-0 përballë ekipit të shqiptarëve të Maqedonisë, FK Vllaznimi, i cili militon në ligën e parë maqedonase. Takimi mes këtyre dy skuadrave është luajtur dje në Strugë, ku Kombëtarja U-19 po vazhdon prej disa ditësh një fazë përgatitore në prag të të eliminatoreve të Kampionatit Europian që do të zhvillohet në San Marino 13-18 nëntor. Kombëtarja e moshave e ka fituar ndeshjen me rezultatin 2-0. Ky ishte testi i parë për djemtë e teknikut Ramadan Shehu gjatë këtyre ditëve të grumbullimit. Në këtë ndeshje, trajneri aktivizoi përzgjedhjen e tij më të mirë, e cila shikonte të riun Andoniu në portë dhe para tij, në mbrojtje, ishin vendosur Pulaj, Shehu, Hoxha, Ruco. Mesfusha përbëhej nga Manuka, Myftaraj, Hasani dhe Koni, ndërsa sulmi i ishte besuar dyshes Tushe e Tepshi. Në pjesën e dytë u aktivizuan si zëvendësues edhe Vajushi, Djepaxhia, Muça dhe Beqiri. Pas vetëm 15 minutash lojë Tushe kaloi në avantazh Shqipërinë U-19 në avantazh, ndërkohë që goli i dytë dhe i fundit i kësaj ndeshjeje erdhi në minutën e 65-të dhe kishte për autor Manukën. Sot skuadra do të udhëtojë drejt qytetit të Tetovës ku do të zhvillojë një tjetër ndeshje miqësore me një tjetër ekip shqiptar, KF Renovën. Kombëtarja U-19 në datë 4 nëntor do të udhëtojë drejt Qipros për të luajtur edhe dy miqësoret e fundit me homologen U-19 të ishullorëve në datat 5 dhe 7 me përfaqësuesen vendase. Eliminatoret e Europianit do të mbahen në San Marino më 13-18 nëntor dhe në Grupin 1, ku ne bëjmë pjesë, kemi kundërshtarë të fortë si Italia dhe Irlanda, por edhe rivalët modest të San Marinos.

A. Manallari