Komisioni për Veprimtaritë Prodhuese, Tregtinë dhe Mjedisin diskuton për Buxhetin 2009
Komisioni për Veprimtaritë Prodhuese, Tregtinë dhe Mjedisin, në mbledhjen e datës 12.11.2008, vazhdoi shqyrtimin e projektligjit : Për buxhetin e shtetit, të vitit 2009.
Në mbledhje u dëgjuan dy informacione, së pari ai i Ministrisë së Punëve Publike, Transporteve dhe Telekomunikacioneve dhe më pas u dëgjua informacioni i Ministrisë së Bujqësisë, Ushqimit dhe Mbrojtjes së Konsumatorit.
Ishin të pranishëm në mbledhje Ministri i Bujqësisë, Ushqimit dhe Mbrojtjes së Konsumatorit Jemin Gjana, dhe specialisti i kësaj Ministrie Agron Vata, si dhe përfaqësuesit e Ministrisë së Punëve Publike, Transporteve dhe Telekomunikacioneve Sonila Bako, Andi Toma dhe Taulant Zeneli.
Në pjesën e parë të mbledhjes, përfaqësuesit e MPPTT sqaruan deputetët për pyetjet e bëra mbi kriteret e shpërndarjes së investimeve, si dhe strukturën e investimeve të paraqitura në projektbuxhetin e vitit 2009.
Gjatë dëgjimit të informacionit të Ministrisë së Bujqësisë, Ushqimit dhe Mbrojtjes së Konsumatorit, anëtarët e Komisionit theksuan edhe një herë se megjithëse bujqësia jep pjesën më të madhe në PBB, kjo degë kryesore e ekonomisë, ashtu si edhe në buxhetet kaluara, vazhdon të mos mbështetet. Ministri, Jemin Gjana paraqiti një propozim që përmbante disa sistemime për projektbuxhetin e vitit 2009 që do të përmirësonin ndjeshëm buxhetin e Ministrisë për vitin 2009. Këto ndryshime ishin:
1. Kalimi i fondit kundërparti të projektit 2KR prej 320 milionë lekësh në buxhetin e vitit 2009 të MBUMK.
2. Shtimi i një fondi prej 40 milionë lekësh të financuara nga MADA, në programin e zhvillimit rural.
3. Shtimi i një fondi prej 40 milionë lekësh të financuara nga MADA për luftimin e brucelozës dhe një fondi prej 50 milionë lekësh për paisje laboratori, financuar nga kooperacioni italian, në programin: Siguria Ushqimore dhe Mbrojtja e Konsumatorit .
4. Përfshirja në buxhetin e MBUMK-së, të buxhetit për Agjencinë e Pagesave.
5. Shtimi i një fondi prej 130 milionë lekësh për programin e zhvillimit rural.
Në përfundim, Komisioni vendosi ta mbështesë këtë propozim në seancë plenare.
(Për më shumë informacion kontaktoni me zyrën e komisionit në numrin: + 355 4 22 78 293).