Komisioni për Veprimtaritë Prodhuese, Tregtinë dhe Mjedisin fillon shqyrtimin e projektligjit për faunën e egër

Komisioni për Veprimtaritë Prodhuese, Tregtinë dhe Mjedisin, në mbledhjen e datës 6 tetor 2008, filloi shqyrtimin e  projektligjit:  Për mbrojtjen e faunës së egër.
Ishin të pranishëm në mbledhje përfaqësuesit e Ministrisë së  Mjedisit, Pyjeve dhe Administrimit të Ujërave, Taulant Bino, Saimir Hoxha, Elvana Rama dhe  Bajram Ejdiaj.
Fillimisht, Komisioni dëgjoi një paraqitje të shkurtër të projektligjit nga të  ftuarit. Ata shpjeguan se hartimi i këtij projektligji është realizuar në bazë të detyrimeve  në kuadër të MSA-së me BE-në dhe në zbatim të konventave ndërkombëtare  për mbrojtjen e natyrës, ku vendi ynë është palë. Projektligji synon të  rregullojë  mbrojtjen dhe përdorimin e faunës së egër. Më tej,  u kalua në  pyetje dhe diskutime.
Gjatë diskutimeve u ngrit çështja   nëse  është e nevojshme që  mbrojtja e faunës së egër, të ketë një ligj të veçantë, apo  duhet të jetë në një ligj së bashku  me gjuetinë. Përfaqësuesit e Ministrisë u përgjigjën se së shpejti,  do të vijë për miratim  projektligji Për gjuetinë,  i cili është hartuar  në zbatim të direktivës përkatëse të BE-së.
Shqyrtimi i projektligjit do të vijojë në mbledhjen e ardhshme.

(Për më shumë informacion kontaktoni me zyrën e komisionit në numrin: + 355 4 22 78 293).