Korridori i përbashkët, mollë sherri mes shkollës private dhe poliklinikës

Rreth 30 mijë banorë të një prej lagjeve më të populluara të qytetit të Durrësit prej dy ditësh kanë mbetur pa shërbim shëndetësor për shkak se pronari i një shkolle jopublike ka bllokuar një pjesë të ambienteve të qendrës shëndetësore. Personeli shëndetësor i qendrës, si dhe banorë të Shkozetit kanë protestuar për mohimin e shërbimit dhe zaptimin e padrejtë të objektit përmes ndërtimit të një muri ndarës. Shqetësimi mori menjëherë reagimin e Inspektoratit Ndërtimor dhe Urbanistik me prishjen e murit. Konflikti nisi pak javë më parë, kur me urdhër të drejtuesve të Shëndetit Publik dhe Institutit të Sigurimeve Shëndetësore në korridorin e përbashkët që qendra shëndetësore ndan me shkollën jopublike (“Ledi Dajana”) u hap një sportel për prerjen e faturave për të gjithë ata që paraqiten pranë mjekut të familjes. Përplasja në korridor e nxënësve që shkonin në katin e dytë të godinës së përbashkët dhe pacientëve që rrinin në radhë, ka bërë që pronari i shkollës të ndërtojë murin ndarës, e justifikuar kjo si një masë parandaluese ndaj rrezikut që mund të cenojë shëndetin e fëmijëve. Mjeku Ndue Marku e vlerëson si të pazakontë situatën dhe vlerëson reagimin e shpejtë të Bashkisë së Durrësit nëpërmjet inspektorëve të ndërtimit që bënë të mundur prishjen e murit dhe kthimin e normalitetit ndonëse përmes mbetjeve të inerteve. Ndërkohë, qytetarët janë shprehur të irrituar për pamundësinë për të përfituar nga shërbimet mjekësore pranë kësaj qendre, veçanërisht marrjen e recetave dhe rekomandimeve për te mjekët specialistë. Aksioni për prishjen u bë me mbështetjen e forcave të policisë së rendit dhe mes inerteve të mbetura qendra rinisi funksionimin normal.