Kreu socialist takon vartësit vendorë, u kërkon të mbyllin gojën në Asamble

Drejtuesit lokalë të PS-së nuk i garantojnë mbështetjen Edvinit

Edi Rama, ka mbledhur dje në një takim krerët e degëve të partisë në rrethe, me shpresën për të siguruar mbështetjen e tyre në mbledhjen e sotme të Asamblesë Kombëtare të PS-ës. Duket se këtij qëllimi nuk ia ka arritur, ndërsa zyrtarisht, është bërë e ditur se qëllimi i takimit ka qenë një falënderim i Ramës për drejtuesit e PS-së në bazë për zgjedhjet e 28 qershorit.

Në takimin e djeshëm, kreu i PS–së së Lushnjes, Leonard Gogu, që ka kërkuar publikisht dorëheqjen e Ramës, e bojkotoi këtë mbledhje. Edhe kreu i Shkodrës, Edip Shiroka mësohet se pas takimit informal me kreun e PS-së i ka qëndruar strikt deklaratës së tij të pak ditëve më parë, për dorëheqjen e kreut të PS-së, Edi Rama, duke zbatuar statutin e kësaj partie. “Secili prej nesh duhet të zbatojë statutin. Ia bëra prezent këtë qëndrim timin, nëpërmjet mediave dhe të gjithë duhet të respektojmë statutin”, u shpreh Shiroka, pas takimit të djeshëm.

Në këtë mbledhje, ishin të pranishëm edhe anëtarë të kryesisë socialiste, Gramoz Ruçi, Fatmir Xhafa, Valentina Leskaj, Blendi Klosi apo Mimi Kodheli.