Krim i rëndë në familje, vajza 29-vjeçare vret nënën me pistoletë pas një zënke

Pogradec, 26 janar, NOA Një ngjarje e rëndë
ka tronditur mëngjesin e sotëm qytetin e Pogradecit, pasi është përhapur lajmi
se një vajzë 29-vjeçare ka qëlluar nënën e saj me pistoletë brenda shtëpisë
duke i marrë jetën.

Lajmi konfirmohet për agjencinë e Lajmeve NOA
në mënyrë paraprake nga burimet policore, sipas të cilave autorja e krimit është
Anila Angjo, ndërsa viktima është Shpresa Angjo, nëna e saj.

Krimi mësohet se ka ndodhur vetëm para pak
minutash, i denoncuar nga komshijtë e familjes Angjo në qytetin e
Pogradecit, të cilët kanë dëgjuar të shtënën e armës.

Paraprakisht, bëhet me dijeni se akti i rëndë
ka ndodhur për shkak të një zënke mes nënës dhe vajzës së saj, ku kjo e fundit
e ka qëlluar më pas me një pistoletë.

Forcat policore kanë pohuar se vajza 29-vjeçare,
autore e krimit të rëndë ka dashur të largohet nga vendngjarja, por nuk ka
mundur pasi është kapur prej tyre.

Ndërkaq, grupi hetimor i cili ka mbërritur në banesën
e krimit është duke hetuar të gjitha rrethanat apo shkaqet, duke marrë në
pyetje edhe dëshmitarët për të kuptuar se përse ai ka ndodhur në të vërtetë.

n.e/NOA