Kriza shqiptare përçan në dy grupe Parlamentin Europian

Eljona Ballhysa
“Partia Socialiste e Shqipërisë duhet t’i japë fund bojkotit parlamentar”, - është shprehur dje kryetari i Grupit Parlamentar të Partive Popullore Europiane, që i përket spektrit të partive të djathta europiane, Jozef Doul. Kjo deklaratë vjen vetëm një ditë pas deklaratës së Grupit Parlamentar të së majtës europiane, të cilët i bënin thirrje politikës shqiptare për transparencë të plotë të procesit zgjedhor. Duket qartë se kriza politike në Shqipëri i ka kapërcyer kufijtë e shtetit shqiptar duke përçarë në dy grupe dhe Parlamentin Europian. Hapja ose jo e kutive të votimit ka ndarë më dysh Parlamentin Europian, i cili nuk ka një qëndrim të unifikuar për këtë çështje, duke e kthyer krizën shqiptarë në një krizë europiane.
Grupi i djathtë
Deklarata e Jozef Doul erdhi pas vendimit të marrë nga Partia Socialiste shqiptare, e cila nuk do të marrë pjesë në punimet e komisionit hetimor parlamentar që u miratua vetëm me votat e maxhorancës. “Shqipëria është një vend që pret të ndërmarrë hapa të mëdha drejt BE-së. Bojkoti parlamentar dhe vazhdimi i akuzave dëmton imazhin e Shqipërisë në BE dhe në veçanti në një kohë kur janë duke u diskutuar çështje të rëndësishme siç është liberalizimi i vizave. Parlamenti është vendi për të dialoguar dhe për të zgjidhur mosmarrëveshjet”, - është shprehur Doul. “Ne e konsiderojmë thelbësor funksionimin e shtetit ligjor, respektimin e vendimeve të gjykatave, transparencën, por edhe respektimin e parimit të ndarjes së pushteteve. Partia Socialiste duhet t’i drejtohet gjykatës për shqetësimet e saj. Praktikat bllokuese, protestat, kërcënimet dhe bojkoti e dëmtojnë shumë procesin integrues dhe imazhin e Shqipërisë”, - është shprehur Doul. Ai theksoi se delegacioni i PE-së në vendet e Europës Juglindore ishte impresionuar nga progresi i Shqipërisë dhe nga përmbushja e kushteve teknike që lidhen me përfitimin e liberalizimit të vizave. “Ne u bëjmë thirrje partive politike shqiptare që të bashkëpunojnë në Parlament dhe në institucionet shtetërore që të realizojnë reformën zgjedhore dhe të vazhdojnë normalisht me procesin integrues të vendit”, - përfundon deklarata e Doul.
Grupi i majtë
Vetëm një ditë më parë reagoi Grupi i Aleancës Progresive të Socialistëve dhe Demokratëve në Parlamentin Europian përmes një deklarate lëshuar liderëve politikë shqiptarë duke u kërkuar atyre që të zgjidhin ngërçin politik, pasi në të kundërt, Shqipëria rrezikon integrimin e saj në BE. Ky grupim politik thekson se shumica në pushtet akoma nuk i ka kthyer një përgjigje konkrete opozitës parlamentare për të realizuar kërkesën e saj mbi transparencën e plotë të zgjedhjeve duke hapur edhe kutitë e votimit. “Pas kthimit të pjesëtarëve të Partisë Socialiste të Shqipërisë në Kuvendin e Shqipërisë, nuk është dhënë ende nga ana e partive të maxhorancës qeverisëse një përgjigje e kënaqshme për kërkesat e opozitës për ngritjen e një komisioni hetimor parlamentar, që do të zhvillojë një hetim të plotë, duke përfshirë edhe hapjen e kutive të votimit, mbi mënyrën se si u zhvilluan zgjedhjet parlamentare të 2009-s. Shqipëria e gjen sërish veten në një krizë të thellë politike, e cila po bllokon seriozisht ambiciet europiane të vendit”, - thuhet në deklaratë. Më tej, në këtë deklaratë, Grupi i Socialistëve dhe Demokratëve në PE-së u bën thirrje forcave politike shqiptare dhe liderëve të tyre që të kryejnë transparencën e zgjedhjeve jo vetëm për zgjidhjen e situatës aktuale politike, por edhe për krijimin e një baze të qëndrueshme për përmirësimin e Kodit Zgjedhor dhe për mënyrën e organizimit të zgjedhjeve të ardhshme lokale apo parlamentare, me qëllim që këto zgjedhje të përmbushin standardet ndërkombëtare dhe të mos kontestohen si zgjedhjet e vitit të kaluar. Sipas socialistëve dhe demokratëve europianë, nevojitet që mënyra e zgjidhjes së krizës politike të realizohet përmes një dialogu konstruktiv midis maxhorancës dhe opozitës, me synimin për të rritur e forcuar edhe procesin e integrimit të vendit në Bashkimin Europian. Madje dy zëvendëspresidentët e Grupit të Demokratëve dhe Socialistëve Europianë, përkatësisht Severin dhe Svoboda, kanë shprehur vullnetin e tyre politik që së bashku me përfaqësues të tjerë të Partive Popullore Europiane të vizitojnë Shqipërinë për të ndihmuar në një zgjidhje të ekuilibruar të krizës politike.

26 Mars 2010