Krizë shkodrane, edhe Laçi e mund Vllazninë

 Leonard KarajVllaznia humbet sërish, këtë herë ndaj Laçit ndërsa Besa nuk e ka të vështirë të mundë Apoloninë në “Loni Papuçiu” duke mbajtur ritmin e Dinamos.E diela e dy ndeshjeve të fundit të javës së 19-të ka dhuruar surpriza në futbollin e Superligës. Sepse kanë fituar dy skuadrat udhëtuese, Besa në Fier dhe Laçi në Shkodër. Duke shokuar Vllazninë, që nuk po shikon dritë në fund të tunelit, ku e ka parë veten gjatë tërë këtij sezoni, dhe Apoloninë, që nën drejtimin e Hasan Likës e ka humbur orientimin. Në këtë mënyrë, Besa nuk i ndahet Dinamos kryesuese, në pritje të riluajtjes së ndeshjes me Flamurtarin, më 3 shkurt. Po kështu, Laçi ruan pozitat e tij në renditje, në mesin e artë të klasifikimit, duke bërë surprizën më të madhe të kësaj jave në “Loro Boriçi”. Në këtë mënyrë, ish-skuadra e tij, Laçi, i ka bërë gjëmën Edi Martinit, që në dy ndeshje në krye të Vllaznisë, ka pësuar dy humbje, me të njëjtin rezultat, 2-1, në Peqin dhe në Shkodër. Në Fier ka shënuar golin e parë verdhezi Vioresin Sinani, tashmë në radhët e Besës, sikurse ka dhënë një asist për Daniel Xhafën, që ka vulosur fitoren 2-0 të kavajasve në “Loni Papuçiu”. Në përfundim të dy takimeve drejtuesit vendas, si në Fier dhe në Shkodër kanë akuzuar arbitrat për gjykimin e dobët të këtyre ndeshjeve. Më të forta kanë qenë akuzat e presidentit të Vllaznisë, Valter Fushaj ndaj gjyqtarit, Artan Taullaraj. Javën tjetër Vllaznia do të jetë në Tiranë, ndaj bardhebluve të Alban Tafajt dhe Nevil Dedes.