Krujë, merret peng për borxhin
KRUJE - Marrin peng 20-vjeçarin se nuk iu ktheu borxhin, arrestohen dy të rinj në Krujë. Policia bëri të ditur se dje arrestoi 19-vjeçarin Ded Bushgjoka dhe 20-vjeçarin Ndue Ndoj, të dy banues në Dukagjin të Ri në Krujë. Arrestimi i tyre u bë pasi rreth orës 00:30 të së hënës, në fshatin Dukagjin i Ri, kanë ndaluar e marrë me forcë duke e goditur me dorezë hekuri në kokë e kërcënuar me armë zjarri automatik bashkëfshatarin e tyre B.D. Mësohet se 20-vjeçari iu kishte blerë atyre një javë më parë një motor që ata e kishin vjedhur. Por i riu nuk ua kishte dhënë lekët pas tre ditësh, ashtu siç edhe ata kishin rënë dakord me njëri-tjetrin. Nën kërcënimin e armës, autorët e kanë futur në bagazhin e një mjeti duke e transportuar në Kamëz. Kur kanë mbërritur atje, dy të rinjtë kanë ndaluar për pak momente mjetin, ndërsa pengu ka shfrytëzuar rastin për t'u larguar duke bërë edhe denoncimin. r.n