Kryeministri Berisha: Japonia vlerëson përpjekjet e Shqipërisë dhe shqiptarëve për zhvillim dhe demokraci

Në mbledhjen e sotme të grupit parlamentar, kryeministri Berisha rivlerësoi vizitën në Japoni, si një vizitë të shkëlqyer dhe shumë të rëndësishme për konsolidimin e miqësisë mes dy vendeve. “Shqipëria gjen tek Japonia,  një mik shumë të shquar, që ka vlerësuar përpjekjet e Shqipërisë dhe shqiptarëve për tu ndarë nga një e shkuar tmerrësisht e  hidhur. Nje vend mik, që ka kontribuar në të gjitha fushat e  zhvillimit të këtij vendi dhe që është e vendosur të kontribuojë edhe më shumë.” tha Kryeministri.

Kryeministri theksoi se kredia prej 100 milion dollarësh, e premtuar qartësisht nga kryeministri Fukuda , u shoqërua me zotimin për shqyrtimin e një seri projektesh të tjera shumë të rëndësishme.

Kryeministri tha se në vizitën, e cila pati një jehonë të madhe në shtypin dhe medien japoneze, u diskutua gjerësisht për Kosovën dhe rajonin, si dhe u bënë përpjekjet maksimale për të tërhequr vëmendjen e  investitorëve japonezë për të investuar në Shqipëri.

Kryeministri vlerësoi se personalitet më të larta të vendit treguan interes të madh për Shqipërinë dhe shqiptarët, gjë e cila u dëshmua edhe nga pritja e rezervuar nga madhëritë së tyre imperiale, perandori Akihito dhe perandoresha Michiko, e cila zgjati më tepër se koha e parashikuar. Ndër të tjera, kryeministri vlerësoi edhe takimin shumë miqësor të zhvilluar me kryeministrin  e vendit Fukuda.