Kryeministri Berisha i dërgon mesazh ngushëllimi Kryeministrit italian Berluskoni, për fatkeqësinë natyrore në rajonin e Mesinës

Kryeministri Berisha i ka dërguar një mesazh Kryeministrit të Republikës së Italisë. Z. Silvio Berluskoni, përmes të cilit shpreh ngushëllimet më të sinqerta për pasojat e fatkeqësisë natyrore, të shkaktuar nga reshjet e jashtëzakonshme dhe shkarjet masive të terrenit në rajonin e Mesinës.

Në këtë mesazh, Kryeministri shkruan:

“I nderuar Zoti Kryeministër, Berlusconi,

Me keqardhje të thellë mësuam për fatkeqësinë natyrore të shkaktuar nga reshjet e jashtëzakonshme dhe shkarjet masive të terrenit në rajonin e Mesinës, si pasojë e të cilave humbën jetën një numër i madh qytetarësh të vendit tuaj, u plagosën shumë të tjerë dhe u shkaktuan dëme të konsiderueshme materiale.

Më lejoni që në këtë çast dhimbjeje të ndaj me Ju, qeverinë dhe kombin mik italian, hidhërimin për humbjen e jetëve njerëzore dhe t’Ju shpreh, në emrin tim e të qeverisë shqiptare, por edhe në emër të të gjithë shqiptarëve, ngushëllimet dhe ndjenjat më të sinqerta të solidaritetit njerëzor, për këtë humbje të madhe, për familjet e viktimave dhe kombin tuaj dhe lutjen tonë, që shpirtrat e tyre të gjejnë paqen e amshuar.

Gjithashtu, ne urojmë së bashku me ju për shpëtimin e personave të humbur nga ekipet e specializuara, shërimin e të lënduarve dhe kthimin e tyre të shpejtë në gjirin e familjeve.

Me sigurimet e konsideratës sime më të lartë,

Juaji

Sali BERISHA”