Kryeministri Berisha takon Zëvendëssekretarin e Përgjithshëm të OKB-së, Antonio Maria Costa

Kryeministri Sali Berisha zhvilloi të mërkurën një takim me z.Antonio Maria Costa, Zv/Sekretar i Përgjithshëm i OKB-së dhe njëkohësisht Drejtor i Ekzekutiv i OKB-së për Drogën dhe Krimin (UNODC).

Kryeministri Berisha theksoi rëndësinë që ka për qeverinë shqiptare forcimi i bashkëpunimit me OKB-në, në veçanti lidhur me luftën kundër drogës, krimit, por edhe në kuadër të luftës kundër korrupsionit në kuadër të Konventës së OKB-së për Luftën Kundër Korrupsionit. Kryeministri i shprehu angazhimin dhe vendosmërinë e plotë të qeverisë shqiptare në këtë drejtim dhe vlerësoi se lufta kundër korrupsionit, krimit të organizuar dhe trafiqeve janë jetike për rivendosjen e shtetit ligjor dhe konsolidimin e demokracisë në Shqipëri.

Z.Costa i prezantoi kryeministrit platformat e hartuara nga UNODC për luftën kundër krimit të organizuar dhe trafiqeve, të cilat parashikojnë koordinimin e veprimtarisë në këtë fushë të të gjithë vendeve të rajonit të prekura nga ky lloj trafiku, nëpërmjet një plan-aksioni të përbashkët afatmesëm.

Kryeministri përmendi disa arritje të qeverisë në këtë drejtim, siç është shkatërrimi i disa organizatave krimninale si dhe punën që po bëhet për ndalimin dhe vënien përpara drejtësisë të drejtuesve të tyre, në bashkëpunim me faktorin ndërkombëtar.

Z.Costa falenderoi qeverinë shqiptare për impenjimin e madh dhe angazhimin që po tregon përsa i përket luftës kundër korrupsionit përfshirë këtu edhe nënshkrimin e konventës së OKB-së për luftën kundër korrupsionit dhe diskutoi me Kryeministrin mbi strategjitë e përshtatshme për impelementimin e kësaj Konvente.

Kryeministri i shprehu gatishmërinë e qeverisë shqiptare për të bashkëpunuar ngushtë me UNODC-un si dhe vendosmërinë për të implementuar me efikasitet Konventën për Luftën kundër Korrupsionit si një dokument shumë të rëndësishëm që do të sjellë një impuls të ri në luftën kundër korrupsionit.