Kryeministri Berisha takon sportistin e mirënjohur të okeit, me origjinë shqiptare, Taj Domi

Kryeministri Berisha pati sot një takim në rezidencën qeveritare “Rideau Gate” me personalitetin e njohur në mbarë botën në sportin e okeit, me origjinë shqiptare, Ty (Taj) Domi, i cili shoqërohej nga Danny Guy, administratori i shoqërisë së njohur të kapitaleve “Salida”.

Kryeministri Berisha e përgëzoi sportistin me origjinë shqiptare për arritjet në sportin fisnik dhe burrëror të okeit, si dhe shprehu kënaqësinë për interesimin e tij dhe shoqëruesit të tij për të investuar në Shqipëri.

Kryeministri i ftoi bashkëbiseduesit të vijnë dhe investojnë në vendin tonë, si një vend me potenciale të mëdha në fushën e shfrytëzimit të mineraleve, në tekstile, në turizëm, në energji etj..

Sportisti i mirënjohur, së bashku me biznesmenin që e shoqëronte, shprehën gatishmërinë e tyre për të investuar së shpejt në përpunimin e burimeve shqiptare në minerale, si dhe në fusha të tjera.

Kryeministri Berisha i garantoi ata për mbështetjen e qeverisë dhe agjencive të saj për cilindo investitor që vjen në Shqipëri me qëllim zhvillimin e ekonomisë së vendit.