Kryeministri Berisha vijon në Farkë turin “Shqipëria po ndryshon”

-Kryeministri theksoi se qeveria shqiptare nuk po investon vetëm në akset e mëdha kombëtare në të cilat janë 800 km autostrada dhe rrugë, por dhe në  të gjitha komunat dhe bashkitë e vendit për urbanizimin dhe asfaltimin e sistemimin e rrugëve
Kryeministri Berisha në vijim të turit “Shqipëria po ndryshon”, ishte sot në komunën e Farkës të rrethit të Tiranës, ku inauguroi disa vepra publike.
Kryeministri përurori fillimisht përfundimin e punimeve për rikonstruksionin e rrugës Uzina e Traktorëve-Farkë e Madhe, investim ky i buxhetit të shtetit dhe komunës me vlerë 64. 7 milionë lekë.
Pasi ka përgëzuar Ministrinë e Brendshme për fondin e akorduar, kryeministri ka uruar banorët e Farkës për këtë rrugë të re dhe i ka siguruar ata se qeveria është e vendosur të investojë për urbanizimin e plotë të kësaj zone, e cila është është një nga bukuritë më mahnitëse të Shqipërisë.

Gjithashtu Kryeministri inaguroi përfundimin e punimeve të rrugës me gjatësi 1.2 km e me vlerë 23 milionë lekë, nga reparti i tankeve-në lagjen Musabal. “I shtohet sot kësaj zone rruga e dytë e përfunduar e asfaltuar, e cila ka përfunduar brenda një kohe të shkurtër në zonën e Farkës. Siç e shihni nuk po investojmë vetëm në akset e mëdha kombëtare në të cilat janë 800 km autostrada dhe rrugë, por po investojmë në të gjitha komunat dhe bashkitë e vendit për urbanizimin dhe asfaltimin e sistemimin e rrugëve”, u shpreh Kryeministri.  

Në përfundim Kryeministri inspektoi punimet në rrugën nga depoja e ujit-në fshatin Cellak , investim me vlerë 27 milionë lekë, 2/3 e së cilës i përket Bashkisë së Tiranës, ndërsa 1/3 Komunës Farkë.
“Erdha këtu se kjo rrugë që shtrohet e tëra nga komuna e Farkës 1/3  e ka në territorin e Komunës ndërsa 2/3 i ka në territorin e Bashkisë së Tiranës, pasi kryetari me korrespoondencë i qendrës së Tiranës kujdeset vetëm për qendrën dhe bojatisjen e saj. Për të nuk ekziton periferia e Tiranës. Ai detyron komunat përreth të investojnë dhe të asfaltojnë dhe sistemojnë rrugët e qytetit, që duhet të ishte e kundërta. Qyteti duhet të rrezatonte urbanistikë, rrugë, drita ujësjellës. Këtu ndodh e kundërta sepse  ai është kryetar me korrespondencë dhe i përqëndruar në qendër”, theksoi Kryeministri.

Kryeministri ka përgëzuar kryetarin e Komunës së Farkës, për dhuratën që ka vendosur t`i bëjë Tiranës për të shtrirë deri në Njësinë nr.2 rrugën e asfaltuar.  
“Dhuratat nuk vlerësohen nga çmimi. Mirësia i mbetet atij që e bën. Ky është një shërbim ndaj qytetarëve. Kryetari i Bashkisë së Tiranës është vetëm kryetar i qendrës nga selia tek Bashkia dhe anasjelltas, aq më tepër që tani as në Bashki nuk hyn më sepse ia ka deleguar nënkryetarit”, tha Kryeministri.