Kryeministri premton thellimin e marrëdhënieve me Rumaninë

Kryeministri Berisha gjatë takimit të zhvilluar me ambasadorin e Rumanisë në Shqipëri, Viorel Stanila ka premtuar angazhimin e qeverise shqiptare për ti forcuar edhe me tej marrëdhëniet në të ardhmen midis dy vendeve. Në takim u theksua rëndësia e intensifikimit të mëtejshëm të shkëmbimeve politike në nivelet më të larta, si edhe zgjerimi e thellimi i marrëdhënieve ekonomike dhe në të gjitha fushat. Në veçanti, Kryeministri Berisha i kërkoi Ambasadorit Stanila intensifikimin e përpjekjeve për nxitjen e investitorëve rumunë për të investuar në Shqipëri. Nga ana e tij, ambasadori Stanila theksoi se ky takim zhvillohet në një moment jashtëzakonisht të rëndësishëm për Shqipërinë, siç është anëtarësimi me të drejta të plota në NATO. Ambasadori Stanila  i shprehu urimet më të ngrohta kryeministrit Berisha, duke vlerësuar lart kontributin personal të tij për këtë arritje historike për Shqipërinë e shqiptarët. Më tej, ambasadori Stanila i shprehu kryeministrit Berisha angazhimin e tij të plotë si përfaqësues i Rumanisë në Shqipëri për të kontribuar në forcimin më tej të marrëdhënie miqësore midis dy popujve, si edhe marrëdhëniet shumë të mira midis qeverive të të dy vendeve.