Kryeparlamentarja Topalli vizitë në Maqedoni

Kryetarja e Kuvendit Jozefina Topalli do të zhvillojë një vizitë dy ditore në Shkup, me ftesë të Kryetarit të Parlamentit të Maqedonisë, Trajko Veljanovski.
 

Në ditën e parë të vizitës së saj, Topalli do të takohet me Kryetarin e BDI-së Ali Ahmeti dhe me Kryetarin e PDSH-së, Menduh Thaçi ndërsa më pas do të vizitojë Shtëpinë muze të Nënë Terezës, Komunën e Çairit si dhe do të ketë një darkë pune me Zv/Kryeministren për Eurointegrime, Teuta Arifi.
 

Në ditën e dytë të vizitës, Topalli dhe deputetët që e shoqërojnë, në orën 10.00 do të priten në një takim zyrtar nga Kryetari i Parlamentit të Maqedonisë, Trajko Veljanoski ndërsa më pas Topalli do të mbajë edhe një fjalë përshëndetëse para deputetëve të Maqedonisë.
 

Topalli, përveç takimit me deputetët e grupit të miqësisë Maqedoni-Shqipëri, do të takohet edhe me një grup të grave deputete si dhe në vijim do të ketë takim me Kryeministrin Nikolla Gruevski dhe me Presidentin Gjorgje Ivanov.